Sesaun plenária Parlamentu Nasionál. Imajen/Tatoli

DILI, 15 outubru (2019) – Loron 15 outubru hanesan loron importante tanba nasaun tomak iha mundu komemora loron internasionál Feto Rurál, tanba ne’e Grupu Muller Parlamentár Timor-Leste (GMPTL), liuhosi Deputada Bankada PD, Elvina Sousa Carvalho hato’o felisitasaun ba loron importante ne’e.

“Lori GMPTL nia-naran hato’o parabéns ba Feto Timor-Leste tomak, espesiál ba ami-nia inan-feton sira ne’ebé iha área rurál no remota sira. Ami-nia saudasaun no hakuak bo’ot ba imi iha loron espesiál ida-ne’e”, tenik Deputada Bankada Opozisaun-ne’e iha sesaun plenária Parlamentu Nasionál (PN), tersa-ne’e.

Nia haklaken, komemorasaun loron importante-ne’e tanba iha tinan hirak liubá nasaun membru hotu iha Organizasaun Nasaun Unida (ONU) halibur malu ho objetivu atu fó onra ka valoriza inan-feton hotu ne’ebé iha área rurál ne’ebé fó kontribuisaun bo’ot tebes iha prosesu dezenvolvimentu nasaun ida-idak nian.

“Ho nune’e maka GMPTL ho fuan bo’ot hakarak valoriza feto-maluk sira iha área rurál sira hotu iha Timor-Leste ba ita bo’ot sira-nia serbisu no kontribuisaun ba dezenvolvimentu iha rai doben ida-ne’e nian”, nia akresenta.

Nia observa, durante-ne’e loron-loron inan-feton sira hala’o serbisu iha área rurál maka’as tebes hanesan sai inan ba oan-sira, sai laen ba aman-sira, sai bin no feton-sira, no ba família hodi serví uma laran.

“Serbisu ne’ebé mak inan-feton sira hala’o la’ós serbisu ne’ebé fásil maibé todan tebes. Haree mós ba dezenvolvimentu infraestrutura, saúde, edukasaun no seluk tan seidauk kobre ba sira iha área ne’ebá. Ida-ne’e fó impaktu negativu ba sira-nia moris kada loron, ezemplu ki’ik hanesan fasilidade saúde ba inan isin-rua no tur-ahi sira seidauk másimu”, nia subliña.

Maski dezafíu barak maka feto rurál sira hasoru maibé la sai obstáklu ba sira hodi luta nafatin kada loron hodi buka ai-han hodi hatutan moris no dezenvolve família atu sai forte liután.

“Biar iha limitasaun oi-oin maibé inan-feton balun konsege eduka sira-nia oan iha nível edukasaun ne’ebé aas hodi serví sosiedade no nasaun ida-ne’e’, nia tenik tan.

Haree ba kestaun hirak-ne’e hotu, GMPTL sei hala’o ninia misaun hodi fiskaliza implementasaun programa Governu ba moris di’ak feto sira iha área rurál.

“GMPTL mós sei halo advokasia atu asegura moris di’ak ba feto-sira liuhosi halo audiénsia ho parseiru xave-sira atu haree ba dezenvolvimentu feto iha área rurál”,  Deputada ne’e dehan tan.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here