Diretór Edukasaun Munisipál Ermera, Carlos Salsinha. Foto TATOLI: Rafy Belo

DILI, 15 outubru 2019(TATOLI)-Diretór Edukasaun Munisípiu Ermera, Carlos Salsinha informa katak tinan rua ona estudante sira husi eskola Ensinu Báziku, Ensinu Sekundáriu (EBES) balun iha Munisípiu Ermera seidauk iha kaderneta eskolár

Maske la fo númeru ezatu eskola no estudante na´in hira mak seidauk iha kaderneta, maibe nia dehan problema kaderneta sai dezafiou iha Munisípiu Ermera.

Inan-aman sira tau kestaun ba kaderneta tanba tinan rua ona nunka akompañia progesividade oan sira nian. Ida ne’e mak sai dezafiu bo’ot ba eskola sira iha Ermera.

“Ami hato’o ona asuntu kaderneta eskolár ne’e ba Ministériu Edukasaun nasionál maibé tinan rua ona seidauk rezolve de’it. Profesór sira iha Ermera uja hela follas ne’ebé eskola aranja rasik hodi prienxe estudante sira nia valór,” hateten Diretór Carlos Salsinha ba jornalista sira iha edifísiu Imprimi Nasional Timor- Leste (INTL), Colmera (15/10/2019).

Nia dehan, parte Ministeriu Edukasaun Munisipál (MEM) halo ona proposta no envia ona mai  nasionál maibe reposta ne’ebé MEM simu mak hein de’it agora halo tinan rua ona, hahú iha 2018-2019. “Ami to’o la hatene kestaun saida mak difikulta estudante sira iha Ermera inklui inan-aman sira to’o agora labele asesu ba kaderneta eskolár oan sira nian,” nia dehan.

Diretór Carlos afirma katak maske problema kaderneta eskolár seidauk rezolve maibé nia kontinua enkoraja inan-aman sira atu nafatin pasiénsia hodi hein atu nune’e Ministériu Edukasaun, Juventude no Desportu (MEJD) bele buka meius ba problema ne’e.

Nia espera, ba futuru, MEJD tenke trata planu ida di´ak atu nune’e 2020 bele tau orsamentu ba setór imprensaun hodi bele haree asuntu sira ne’e tanba kaderneta eskolár ne’e importante tebes ba labarik no inan aman sira atu nune’e bele avalia no motiva oan sira.

“Agora laiha kaderneta eskolár difisil ba inan-aman sira oinsá atu suporta oan sira ninia estudu tanba oan sira ninia progresividade, dependénsia mós ba inan-aman sira,” nia konsidera.

Jornalista : Tomé Amado

Editór       : Rafy Belo 

HAKEREK NO HATÁN

Please enter your comment!
Please enter your name here