Ilustrasaun

DILI,15 outubru 2019 (TATOLI)-Koordenadór Eskola Bázika Filiál (EBF) Ai-lelehun, Camea, Becora, Luis Coreia hateten katak sira-nia eskola susar atu asesu bee moos tanba ne´e maske eskola aplika “Fase Liman Ho sabaun” maibé iha difikuldade.

“Bee ne’e iha, mas ita la´o kilo ida ka rua mak foin to bee-matan maibé iha merenda eskolár iha eskola entaun labarik sira lori rasik bee husi uma mak mai maibé atividade ida fase liman ho sabaun ne’e ami implementa deit maibé ami iha ne’e bee la iha ami uza de´it akua rua ho toalla ida hodi fase liman molok labarik sira merenda eskolar,” informa Koordenadór Luis Coreia  iha diskursu, iha ámbitu komemorasaun loron mundiál fase lima ho sabaun, iha Eskola Bazika Filiál Ai-lelehun, Camea, Becora ohin.

“Labarik bainhira han karik xefe turma tuir hodi lori bee akua ne’e fase labarik sira-nia liman hodi haruka forma atu han hahán ne’ebé eskola sira prepara. Ida ne’e mak durante ami hala’o hela, difisil tebes ba ami maibé ami nafatin implementa duni ba ita-nia jerasaun foun sira,” hatutan manorin na´in ne´e.

Manorin na´in EBF Ai-lelehun ne’e informa estudante sira ne’ebé iha eskola ne’e rasik totál hamutuk 166.

Iha fatin hanesan, Espoza Prezidente Repúblika, Cidalia Nobre sente triste ho kondisaun eskola EBF Ai-lelehun tanba haris fatin (Casa de banho) la iha ba alunu sira, tantu mane no mós feto.

Nia hateten, estudante sira ne´ebé fetoran no hetan ona menstruasaun, bainhira haris fatin la iha sei difikulta tebes sira tanba susar atu troka. Nia hatutan tan katak edukasaun tenke nu´udar prioridade primeiru, alende prioridade seluk tan tanba futuru nasaun depende ba edukasaun.

“Futuru ne’e husi labarik sira agora daudaun ne’e no labarik sira mak nu’udar kontinuadór nu’udar ai-rin nasaun nian ba futuru mas ita la kria kondisaun di´ak ba sira ne’e, kuitadu,” konsidera espoza Prezidente Repúblika.

Notísia relevante:Timor-Leste Komemora Loron Mundiál Fase Liman Ho Sabaun

Jornalista: Felicidade Ximenes

Editór      : Rafy belo

HAKEREK NO HATÁN

Please enter your comment!
Please enter your name here