Alkoolizmu. Ilustrasaun

DILI, 14 outubru 2019 (TATOLI)-Timor-Leste liuhusi Ministériu Saúde (MS) realiza atividade “Walk The Talk” hanesan kampaña ba saúde ninian ne’ebé etapa primeiru MS halo durante ne’e hodi halo sensibilizasaun no promosaun kona-ba “risku” alkool, ba komunidade sira tanba hafoin indepedénsia to´o ohin loron Timor-Leste seidauk realiza atividade ne´e.

“Ne’e hanesan pasu primeiru, entaun ita hahú husi Dili depois mak ita sei estende ba munisípiu sira seluk hodi prevene alkool ida ne’e hanesan ezemplu ida hodi ita hatudu ba komunidade sira iha munisípiu sira seluk,” dehan  Xefe Departamentu Moras La Hada’et, Frederico Bosco ba  profisionál komunikasaun sosiál sira, iha Cristo Rei, fim-de-semana ne´e.

Xefe ne´e informa, MS iha ona planu multisetoriál atu kontrola moras la hada’et entaun iha planu multisetoriál kontrola moras la hada’et ne’e iha ne’ebá ita envolve kada instituisaun sira atu bele prenvensaun ba moras la hada´et primeiru mak atu evita konsumu alkool ne’e.

“Ita mós estabelese ekipa tékniku multisetoriál kontrola moras la hada´et ida ne’e hodi estende ona ba Munisípiu Ermera no fulan ida ne’e ita sei estende hotu ba munisípiu sira seluk no liuhusi ekipa ida ne’e mak ita bele halo atividade ezemplu kontrola tabaku, kontrola alkool no kontrola mós fatór sira seluk ne’ebe mak envolve iha Munisipiu para envolve ona ita nia lideransa lokál no liña ministeriál ne’ebé mak iha nivel munisípiu para hotuhotu partisipa iha kampaña ba moras la hadaet liuliu mak evita uzu alkool,” hateten Frederico Bosco.

Nia hateten, uzu alkool mós iha númeru aas tebes hanesan ezemplu peskiza nasionál ba kanek no risku ba moras la hadaet no dadus ne’e iha 2015 nian hatudu katak prevalensia konsumu tua durante loron 30 ba populasaun tomak ne’e iha 17.4%, iha mane hamutuk 42% no feto 2% signifika totál populasaun ne’e 17.4 mak konsumu iha alkool.

Hemu tua no lanu nia impaktu violénsia domestika no konflitu oioin mak mosu iha ita-nia komunidade husi joven sira no mós asidente tráfiku sira.

“Ita mós seidauk iha lejislasaun ka iha tabaku maibé ba tabaku ita iha ona lejislasaun maibé ba alkool ita seidauk maibé foin lalais ita envolve ona iha Parlamentu Nasionál hodi fó hanoin kona-ba lejislasaun no oras ne’e dadaun komisaun F Parlamentu Nasionál hamutuk ho Ministeriu Saúde halo konjunta ida nomos Ministériu Komérrsiu Industria no AIFAESA sira hamutuk halo hela tour ida iha Tailándia kona ba lejislasaun alkool no impaktu alkool ida ne’e no oinsa nasaun Tailandia bele estabelese ninia regulasaun ba alkool ninian.

Nia esplika, MS mós hetan apoiu husi OMS lori peritu internasionál mai Timor-Leste halo konsultasaun ba liñas ministeriál hothotu para oinsa mak bele formula ba lei hodi kontrola alkool.

Ita mós iha ona rekomendasaun hirak ne’e, ita sei iha nivel altu hanesan nivel ministeriál atu nune’e bele diskute hodi fó hanoin balun atu kria ona lei ida ne’e tanba ne’e publisidade ohin loron ne’e ita seidauk iha lei para bandu kona ba alkool ninian maibe étapa ba iha ne’ebá ita la´o daudaun ona.

“Ita seidauk halo estudu ba iha ekonomia ba alkool maibe realidade husi nivel globál hatudu momoos katak ema ne’ebé konsumu alkool iha 54% ne’ebé mak monu ba ki´ak tanba sira konsumu alkool no bainhira alkool ne’e ativu entaun nia mós hanesan substánsia adetivu primeiravés ema konsumu ona hakarak konsumu hela de´it entaun dependénsia ona mak impaktu ekonomia mós mai husi ne’ebá impaktu sosiál hanesan violénsia doméstika no konflitu sira seluk,” konklui Xefe Departamentu Moras La Hada’et, Frederico Bosco.

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here