Ministru Defeza no Ministru Interior Interinu, Filomeno da Paixão de Jesus ohin simu vizita kortezia husi Embaixadóra Federasaun Rúsia mai Indonézia no Timor-Leste (não rezidente), Lyudmila Vorobieva akompaña husi Adidu Militár no Navál Kapitaun Navál Sergey Zhenovatyy iha fatin kortezia Ministériu Defeza. Imajen/Ministériu Defeza

DILI, 14 outubru 2019 (TATOLI)-Ministru Defeza no Ministru Interior Interinu, Filomeno da Paixão de Jesus, ohin, simu vizita kortezia husi Embaixadóra Federasaun Rúsia mai Indonézia no Timor-Leste (não rezidente), Lyudmila Vorobieva, akompaña husi Adidu Militár no Navál Kapitaun Navál, Sergey Zhenovatyy iha fatin kortezia Ministériu Defeza, Fatuhada, Dili.

Enkontru  ne’e nudár enkontru kontinuasaun   Ministru Defeza Timor-Leste ho Vise-Ministru Defeza Rúsia Col. Jenerál Alexander Vasilyevich Fomin ne’ebé hala’o iha marjen Diálogu Shangri-La iha Singapura iha Juñu 2019.

Ministru Defeza, Filomeno hato’o agradese ba kompromisu Rúsia nian hodi estabelese kooperasaun defeza ho Timor-Leste no ba konvite ba Ministru hodi ba partisipa tiha ona iha eventu internasionál militár iha Rúsia iha Jullu 2019 fulan hirak liubá.

Ho vizita ne’e tuir Ministru defeza ne’e  katak, nu’udar país joven, Timor-Leste hakarak estabelese kooperasaun defeza ho país hotu-hotu, liuliu iha mundu globalizadu ohin-loron ne’ebé enfrenta dezafiu kompleksu  oioin, país sira presiza kria kooperasaun no parseria. País ida mesak sei labele responde ba dezafiu global sira ne’e.

Liu husi komunikadu imprensa ne’ebé Ajénsia TATOLI asesu, ohin,  Embaixadóra, Lyudmila Vorobieva hateten, maski Rúsia no Timor-Leste seidauk iha kooperasaun ida makaas, país rua sempre fó apoiu ba malu iha nivel  Organizasaun Nasoins Unidas (ONU) nian.

Rúsia iha kompromisu no prontidaun atu fó apoiu ba Timor-Leste iha setór defeza, no Embaixadóra ne’e transmite kedas desizaun ne’ebé ninia governu foti ona atu fó oportunidade bolsa de estudu ba ofisiais husi F-FDTL no funsionáriu sivíl sira atu ba frekuente kursu iha instituisaun superiór iha Rúsia.

Rúsia mós sei konvida Timor-Leste hodi ba tuir formasaun ka treinu no partisipa iha forum oioin kona-ba defeza nian iha país  ne’e.

Iha faze tuir mai, parte rua Timor-Leste no Rúsia sei intensifika liután interasaun atu bele implementa apoiu ne’ebé Rúsia sei fó ba Timor-Leste liuliu iha área edukasaun ka kapasitasaun ba F-FDTL no funsionáriu sivíl iha Ministériu Defeza.

Embaixadóra mós informa katak Rúsia sei akredita Adidu Militár mai Timor-Leste no sei fasilita kontaktu entre Adidu Seguransa Rúsia nian iha Jakarta, Indonézia atu bele esplora mós oportunidade kooperasaun iha área seguransa liuliu ho polísia.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here