BOBONARO, 14 outubru 2019 (TATOLI)-Ospitál Referral Maliana, Munisípiu Bobonaro, daudaun ne’e iha ambulánsia tolu, maibé ida avaria ona, tanba ne’e presiza tan ambulánsia hodi reforsa servisu atendimentu públiku.
Notísia Relevante : Bobonaro Rejista Kazu HIV/SIDA 86
“Ami presiza tan ambulánsia atu bele reforsa ami nia servisu hodi atende públiku,” informa Diretór Ezekutivu Ospitál Referral Maliana, Bourdalque Fernandes Moniz ba Ajénsia TATOLI, foin lalais ne’e, iha Maliana, Munisípiu Bobonaro.
Mezmu enfrenta difikuldade, Bourdalque Fernandes Moniz, dehan, la’ós obstákulu boot ba sira atu hala’o servisu hodi atende públiku no kontinua fó atendimentu tuir kapasidade ne’ebé iha.
Iha trimestre daruak husi fulan juñu-setembru, ospitál referral ne’e rejista pasiente 12.968 maioria ho moras Infesaun Vias Respiratóriu (IVR) ho diarea.
Nia realsa tan katak, kona-ba ai-moruk sufisiente, tanba daudaun iha item ai-moruk 117 hanesan relasaun sintomatiku, infesaun nian hodi responde atendimentu ba pasiente sira.
Profisionais saúde hala’o kna’ar iha Ospitál Referral Malina hamutuk 115 kompostu husi Médiku espesialista neen, médiku jerál 10, enfermeiru 33, parteira 18, tékniku aliadu ho laboratóriu 14, farmásia neen no departamentu sira seluk tan.
‘’Husi númeru ne’e sufisiente ona atu bele fó atendimentu ba komunidade sira durante ne’e,’’ tenik Bourdalque Fernandes Moniz.
Jornalista : Nelson de Sousa
Editór : Francisco Simões
