Koordenadór AIFAESA Abílio Oliveira Sereno tara tais ba Ministru Koordenadór Asuntu Ekonómiku interinu Fidelis Manuel Leite Magalhães bainhira vizita bá edifísiu AIFAESA. Foto/Natalino Costa.

DILI, 14 outubru 2019 (TATOLI) – Kordenadór Autoridade Inspesaun Fiskalizasaun Atividade Ekonómika no Sanitária (AIFAESA), Abilío Oliveira Sereno, husu ba Ministru Koordenadór Asuntu Ekonómiku interinu, Fidelis Manuel Leite Magalhães, atu hahú tau importansia ba lei sobre regulasaun bebida alkólika.

“Ami hakarak husu ba Ministru Koordenadór Asuntu Ekonómiku atu haree hodi tau importánsia nune’e Governu bele deskuti ona lei bebida alkólika, nune’e fó podér ba AIFAESA halo kontrolu ba kualkér tua ne’ebé fa’an iha Timor-Leste”, dehan nia bainhira MKAE interinu ne’e vizita bá edifísiu AIFAESA iha Matadouru, ohin.

Koordenadór ne’e relata, foin daudaun diretór AIFAESA ida bá vizita Tailándia hodi haree hemun alkólika sira fa’an iha rai ne’ebá ho rigór tebes.

“La’ós ita atu kópia Tailándia nia regulamentu, maibé ho lei bebida alkólika ne’ebé iha ita bele kontrola tua ho tipu saida maka bele fa’an no fa’an de’it iha oras”, katak.

“Tanba ita mós iha ai-han ne’ebé oin-oin, aléinde lei ba regulasaun bebida alkólika, presiza tebes Governu atensaun mós regula produtu hahán sira seluk husi rai-li’ur, nune’e fó ba AIFAESA halo kontrolu ne’ebé di’ak liu”, sujere Abílio Sareno.

Hatán kona-ba kestaun ne’e, Ministru Fidelis Magalhães hateten nu’udar membru Governu nia parte promete sei apoia AIFAESA.

“Ha’u iha devér sei apoiu imi, maibé hau mós ezije imi servisu ne’ebé diak”, dehan governante ne’e.

Ministru hatutan atu aselera no fortalese servisu Estadu nian, papél bo’ot iha kada instituisaun Estadu Governu ne’e somete halo desizaun sira, maibé atu aselera prosesu instituisaun maka MKAE apoia AIFAESA nune’e halo kontrolu diak liu ba hahán importadu sira.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here