Lalenok United FC kampiaun Tasa 12 Novembru époka 2019. Imajen Mídia LFA

DILI, 12 outubru 2019 (TATOLI) – Iha sábadu lorokraik ne’e, iha Estádiu Munisipál Dili, ekipa kampiaun Liga Futeból Amadora (LFA) époka 2019, Lalenok United FC, marka tan istória ida, iha ne’ebé nia halakon armada AD SLB iha Finál Tasa 12 Novembru ho rezultadu golu 3-2.

Hosi vitória ne’e, lori Lalenok United sai kampiaun ba Tasa 12 Novembru époka 2019. Golu vitória Lalenok prodúz hosi jogadór Elias Mesquita iha minutu 48, Francisco da Costa 68 no Italo Pimentel 90+1. Enkuantu, golu SLB marka hosi Mouzinho de Lima iha minutu 13 no Paulo Gally 30.

Hosi vitória ne’e, Lalenok hetan prémiu ho osan montante rihun $15 no tasa. Entretantu, ekipa SLB sai hanesan runner up ba Tasa 12 Novembru, tan ne’e nia sei hasoru malu dala ida tan ho Lalenok iha jogu Super Tasa hodi taka époka 2019 ne’ebé sei hala’o iha 19 outubru iha Estádiu Café Ermera.

Fó hanoin fali, Lalenok FC harii hosi emprezária timoroan, Zenilda Gusmão no Komandante Polísia Operasaun Nasionál, Pedro Belo, iha tinan 2016. Bainhira Lalenok hamriik, hahú joga iha apuramentu Terseiru Divizaun konsege sa’e kedas ba Segunda Divizaun iha 2017.

Iha époka 2018, Lalenok ultrapasa Segunda Divizaun ba Primeira Divizaun LFA époka 2019 no sai kampiaun. Agora, sai tan kampiaun ba Tasa 12 Novembru 2019.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here