Ókulu. Ilustrasaun

DILI, 10 outubru 2019 (TATOLI)-Ospitál Nasionál Guido Valadares (HNGV) liuhusi Departamentu Oftamolojia komemora loron mundiál matan nian ho konsulta no fahe ókulu matan nian ho gratuitu ba negosiante eh komunidade sira iha Merkadu Taibesi, Dili, ohin. Tema ba komemorasaun loron internasionál ne´e mak “Vision First”.

Opthalogiska HNGV Dr. Marcelino Correia. Imajen/Tatoli

Espesialista Matan, Marcelino Correia hateten, objetivu ba loron mundiál matan ne´e, HNGV halo advokasia besik liután saúde ba komunidade sira iha área merkadu Taibesi no buka hatene kona-ba problema saúde matan nian atu nune’e bele halo tratamentu ho di´ak liután.

“Iha loron espesiál ida ne’e, ami husi Sentru Nasionál Matan no mós organizasaun husi WHO (Organizasaun Mundiál Saúde)  no parseiru sira seluk ne’ebé durante ne’e sai ami nia parseiru hodi halao atividade ida ne’e ao mesmo tempu ami mos halo distribuisaun oklu gratuitu ba komunidade sira ne’ebé mak afeita ba moras matan,”dehan Espesialista Matan, Marselino Correira, ba media sira bainhira ramata selebrasaun Loron Mundiál Matan iha Merkadu Taibesi, ohin.

Médiku timoroan ne´e informa katak komemorasaun loron mundiál ba matan ne´e realiza de´it iha Munisípiu Dili no hili merkadu Taibesi tanba konsidera komunidade sira barak iha fatin ne´e no sira buka hodi halibur no haksolok hamutuk.

Nia informa mós katak, iha tinan kotuk, sira konsulta ema kuaze 500 resin no iha tinan ida ne´e (2019) sira konsulta ema kuaze rihun sanulu resin tanba konsidera katak problema matan agora sa´e maka´as no oinsá mak atu prevene moras ida  ne’e tenke halo advokasia para povu sira hakbesik aan hodi halo tratamentu ba matan.

“Iha tratamentu ne’e mai konsulta gratuitu ba sira ne’ebé mak problema matan mai iha ne’e hodi konsulta no depois ita fahe mós oklu gratuitu ba sira tanba durante ne’e oklu la gratuitu operasasaun mak  gratuita maibé ohin loron ne’e loron mundiál saúde matan entaun ami fo oklu gratuita,” dehan espesialista matan, Marselino Correia.

Espesialista ne´e haktuir problema matan iha Timor-Leste ne’e mak primeiru katarata, segundu refraksi tero, problema  fraku ho oklu.

“Atu prevensaun mak oinsá bele hakbesik ba sentru saúde halo tratamentu atu bele hatene sira-nia moras matan ne’e saida tanba moras matan balun mak ita halo tratamentu hodi bele kura maibé moras matan balun mak ita la halo tratamentu ne’e bele sai aat ona. Entaun, ita labele halo tratamentu dia´k fila fali tanba ne’e mak iha ona problema matan 40 ba leten ona oinsá ita hakbesik ba sentru saúde para hatene liután,” nia esplika.

Entretantu, partisipa iha loron mundiál matan nian ne´ebé HNGV liuhusi departamentu Oftamolojia realiza iha Merkadu Taibesi ne´e mak Organizasaun Defisiénsia Matan Timor-Leste, diretór klíniku HNGV, reprezentante OMS iha Timor-Leste, Ministériu Saúde, Xefe Departamentu Moras La Hada´et.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here