Gólgota Mall. Imajen/Osória Marques

DILI, 10 outubru 2019 (TATOLI)-Negosiante Kampu Alor, nu’udar Sidadaun Indonéziu (WNI/Warga Negara Indonesia), oras ne’e, okupa hotu ona  Gólgota Mall ho nia kuartu 122. Nune’e, kada kuartu negosiante sira tenke selu ba Gólgota Mall nia nain $500.00/fulan, tanba ne’e, fulan-fulan rendimentu ne’ebé Gòlgota Mall hetan husi negosiante sira husi total kuartu 122 ne’e $61,000,00.

Konsultora Gólgota Mall, Mimi Chungue.

Konsultora Gólgota Mall,  Mimi Chungue, hateten, Gólgota Mall iha kuartu ne’ebé prepara ba atividade negósiu 122, maibé negosiante husi Kampu Alor ne’ebé muda ba Mall refere okupa de’it kuartu 121 no kuartu ida negosiante sira husu hodi transforma ba Muxola (Musola) atu fasilita negosiante sira halo sira nia ritual hanesan ema fiar nain relijiaun Musulmanu (Islam).

“Muda negosiante Kampu Alor ne’e  programa governu ninian entaun ami atende lai naran ne’ebé mak rejista iha Governu mak vendedór Kampung Alor kuandu muda ba iha Gólgota Mall,” informa  Mimi Chungue, ohin, hodi hatán Ajénsia TATOLI iha Gólgota Mall, Comoro, Dili.

Alein selu ba Gólgota Mall nia nain, tuir akordu ne’ebé estabelese ona, negosiante sira mós iha dever atu selu taxa 10% ba Estadu.

Investimentu ba preparasaun no konstrusaun Gólgota Mall gasta orsamentu purvolta millaun  $3,5

Portavós Aldeia Tera Santa ho Golota, Domingos Ramos Gonçalves.

Husi sorin seluk, portavós Aldeia Tera Santa no Gólgota, Domingos Ramos Gonçalves, husu ba Xefe Suku, Xefe Aldeia ho na’in ba Gólgota Mall atu absorve sira iha serbisu hodi kumpre kompromisu ne’ebé antes halo ona katak, bainhira mall ne’e finaliza sei fó serbisu ba juventude sira husi Tersa Santa ho Gólgota.

“Ami joven sira la satisfeitu, tanba ami maioria la serbisu, mas negosiante sira ba lori fali ema husi fatin seluk mak serbisu. Ida ne’e viola ona kompromisu inísiu entre juventude sira, xefe aldeia ho xefe suku, inklui mall nia nain,” afirma Domingos Ramos Gonçalves.

Portavós ho Juventude Aldeia rua ne’e husu no ezije nafatin sira nia direitu atu fó prioridade ba juventude Gólgota ho Tera Santa atu serbisu iha mall.

“Ami koko ko’alia ona ho Konsultora Gólgota Mall,  Mimi Chungue maibé nia dehan ba hasoru xefe aldeia nune’e ami mós ba xefe aldeia sira maibé sira hi’it liman de’it katak laiha resposta ruma,” Domingos tenik.

Maske nune’e, juventude balun husi Aldeia Tera Santa ho Gógota mak halo hela serbisu no responsabilidade ba area limpeza iha mall Gólgota.

Jornalista : Osório Marques

Editór       : Francisco Simões

HAKEREK NO HATÁN

Please enter your comment!
Please enter your name here