Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 10 outubru 2019 (TATOLI) – Parlamentu Nasionál (PN) liuhosi Komisaun F ne’ebé trata asuntu Saúde, Edukasaun, Seguransa Sosiál no Igualdade Jéneru sei halo fiskalizasaun ba vítima inséndiu iha Munisípiu Liquiçá, Ermera, Aileu no Bobonaro hodi rekolla dadus vítima.

“Akontesimentu ahi-haan uma populasaun-nian iha Liquiçá, Ermera, Aileu no Bobonaro, Parlamentu Nasionál liuhosi reuniaun líder bankada preukupa ho situasaun ida-ne’e no sei autoriza Komisaun F semana oin tuun ba kraik hodi rekolla dadus akontesimentu ne’e tomak hodi haree nesesidade saida maka populasaun sira presiza”, Prezidente Parlamentu Nasionál, Arão Noé informa ba jornalista sira, iha Parlamentu Nasionál, kinta ne’e.

Hafoin Komisaun foti dadus sei halo audiénsia ho Governu, liliu ministériu ne’ebé tutela ba área ne’e hodi bele fó asisténsia tanba agora atu tama ba tempu udan.

Nia dehan, populasaun sira ne’ebé sofre konsekuénsia ba inséndiu ne’e tenke iha mahon ida ba sira hodi proteje-aan iha tempu udan.

“Ida-ne’e ami tau iha ajenda prioridade atu bele rekolla dadus no hatene loloos asaun saida mak Governu halo ona no prioridade saida tan mak atu halo hodi salva guarda situasaun ne’e”, nia akresenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here