Prezidente Parlamentu Nasionál, Arão Noé de Jesus da Costa Amaral. Imajen Tatoli/ Egas Cristovão

DILI, 09 outubru 2019 (TATOLI) – Parlamentu Nasionál (PN), sei aprezenta Lei Fundu Petrolífera (LFP) no Lei Atividade Petrolífera (LAP) hanesan Dekretu foun ba Prezidente Repúblika, Francisco Guterres ‘Lú Olo’.

Apresiasaun foun Dekretu Parlamentu Nasionál nú.9/V- Segunda alterasaun Lei nú.9/2005, 3 agostu kona-ba Lei Fundu Petrolíferu pasa ho votu a-favór 34, kontra 24 no abstensaun 3.

Nune’e mós, apresiasaun foun Dekretu Parlamentu Nasionál nú.10/V-Segunda alterasaun Lei nú.13/2013, 2 setembru kona-ba Lei Atividade Petrolífera pasa ho votu a-favór 34, kontra 24 no abstensaun 1.

“Ami konklui ona apresiasaun foun ba Dekretu Parlamentu Nasionál nian rua ne’e. Tuir sistema normál kuandu muda vírgula ida ne’e Lei foun, 30 dias Prezidente Repúblika hakarak husu ba Tribunál Rekursu nia apresiasaun fila-fali ne’e mós bele”, tenik Prezidente Parlamentu Nasionál, Arão Noé de Jesus da Costa Amaral, iha PN, tersa ne’e.

Nia dehan, maski opozisaun kontinua vota kontra maibé laiha impaktu tanba aprova ho maioria kualifikada.

“Kona-ba dehan laiha konteúdu laiha mudansa, ne’e ida-idak nia interpretasaun, Parlamentu Nasionál labele ezerse fali funsaun Tribunál nian tanba mudansa ne’e muda de’it vírgula ka pontu ida ne’e mós mudansa ona”, katak nia.

Arão Noé esplika, iha LFP artigu 15-A mak Tribunál Rekursu deklara inkonstitusionalidade iha alínea 1, 2 no 3.

Iha proposta alterasaun kona-ba Lei Fundu Petrolífera artigu 15-A, alínea 1 dehan Fundu Petrolífera bele aplika direta iha operasaun petrolífera iha territóriu nasionál ka iha estranjeiru tuir saida mak previstu ona iha artigu 22 LAP.

Enkuantu, iha alínea 2 hateten investimentu husi Fundu Petrolíferu iha operasaun petrolífera previstu iha númeru anteriór ne’ebé iha klase espesiál la aplikável rekizitu konstante husi artigu anterior ho esepsaun dispostu no seu tudo.

Nune’e mós, alínea 3 hateten, iha limite pursentu 5 sei kálkula ho totál  tantu Fundu Petrolíferu hanesan investimentu iha loron inísiu investimentu iha klase ativu.

Tribunál Rekursu (TR) deklara artigu 22 ne’ebé sita partisipasaun Estadu iha operasaun petrolífera iha LAP inkonstitusionál.

“Ohin proposta alterasaun hotu ona no agora Komisaun C halo redasaun finál hodi haruka fali ba Prezidente Repúblika”, dehan PPN.

Deputadu Bankada Partidu Demokrátiku, Adriano do Nascimento, hateten razaun nia parte vota kontra tanba konsidera lei rua laiha mudansa.

“Ha’u vota kontra tanba konteúdu Lei Fundu Petrolífera no Lei Atividade Petrolífera laiha mudansa maski Tribunál dehan inskonstitusionál. Ha’u-nia pozisaun nafatin valoriza ba desizaun Tribunál”, nia haklaken.

Vise Xefe Bankada FRETILIN, Francisco Miranda Branco, dehan loloos PN tenke konsidera saida mak Tribunál deklara ona.

“Dalan úniku mak revee fila-fali hodi hasai tiha dezpozitivu sira ne’ebé Tribunál Rekursu konsidera inkonstitusionalidade”, katak Branco.

Enkuantu, Xefe Bankada Partidu CNRT, Duarte Nunes, dehan lei rua ne’e iha ligasaun ba atividade petrolífera sira iha tasi Timor.

“Ita halo reapresiasaun tanba iha futuru sei fó lukru ka reseita boot ba kofre Estadu tanba ne’e mak labele konfuzaun”, nia akresenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here