Ministru Transporte no Komunikasaun, José Agostinho da Silva. Imajen/ Egas Cristovao

DILI, 09 outubru 2019 (TATOLI) – Ministru Transporte no Komunikasaun (MTK), José Agostinho da Silva, haktuir Organizasaun Mundiál Aviasaun Sivíl ka International Civil Aviation Organization (ICAO, sigla inglés) husu Timor-Leste (TL) atu prienxe rekizitu estrutura Autonomia Unidade Aviasaun Sivíl.

“Organizasaun Mundiál Aviasaun Sivíl fó ba Timor-Leste maka tenke prienxe kritériu Estrutura Autonomia Unidade Aviasaun Sivíl, ita seidauk iha estrutura ida ne’e, ita presiza estabelese estrutura no ita mós tenke iha regulamentu internu ne’ebé regula Autoridade Aviasaun Sivíl ita nian”, ministru ba jornalista sira iha Palásiu Governu hafoin reuniaun Konsellu Ministru, ohin.

Maski nune’e, ministru afirma prienxe ona rekizitu mínimu hosi Organizasaun Mundiál Aviasaun nian, tanba ne’e sira enkoraja nafatin Timor-Leste atu esforsu hodi hadi’a ba área aviasaun sivíl nia performasaun di’ak liután. Tanba ICAO ne’ebé estabelese iha Tailándia prontu atu fó asisténsia ativu hodi dezenvolve Aviasaun Sivíl Timor-Leste nian.

“Ita presiza prienxe ona rekizitu atu Organizasaun Mundiál Aviasaun Sivíl labele izola ita hosi transporte aéreu, se ita la prienxe maka risku ba ita Estadu”, dehan.

Antes ne’e, ministru MTK hetan oportunidade hasoru malu ho Prezidente Asembleia Organizasaun Mundiál Aviasaun Sivíl no sekretáriu jerál liuhosi konferénsia iha Kanadá katak sira kompromete atu apoia téknika ba dezenvolvimentu setór aviasaun iha Timor-Leste.

Ministru José Agostinho da Silva foin daudaun ne’e dezloka bá Kanadá hodi reprezenta Governu Timor-Leste partisipa iha konferénsia internasionál aviasaun sivíl nian iha 24 setembru ne’e no fila iha 7 outubru ne’e.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here