Diretór Jerál Orsamentu Estadu Ministériu Finansa, Januário da Gama, akompaña bainaka sira buti butaun hodi halo lansamentu ba Sistema Informasaun Ofisina Nasionál, ne'ebé hala'o iha Edifísiu Ofisina Nasionál, Balidi, Kuarta (9/10/2019). Imajen Mídia MF.

DILI, 09 outubru 2019 (TATOLI) – Ministériu Finansa (MF) liuhusi Diresaun Nasionál Monitorizasaun Jestaun Patrimóniu Estadu (DNMJPE) estabelese sistema informasaun eletrónika ho naran Sistema Informasaun Ofisina Nasionál (SION) ho objetivu atu evita irregularidade bainhira halo manutensaun ba veíkulu Estadu.

Reprezentante Ministra Finansa interina, Januário da Gama, hateten sistema informasaun ne’e sei dinamiza nafatin tuir mekanizmu servisu DNMJPE espesífikamente ofisina nasionál nian tuir kompleksidade no nesesidade ne’ebé loroloron diresaun ne’e enfrenta.

“Sistema ne’e sei mellora liután integridade servisu liuliu atu hatudu kona-ba transparénsia servisu, kontabilidade servisu nune’e neineik bele kontribui ona hodi bele promove boa-governasaun hosi prosesu ne’e. Sistema ne’e bele evita irregularidade”, dehan Januário da Gama iha lansamentu SION ne’ebé hala’o iha Balidi, ohin.

Atuál Diretór Jerál Finansa Estadu MF ne’e hatutan kuandu laiha sistema eletróniku no uza de’it sistema nasionál maka servidór Estadu sira bele sai kliente ba Komisaun Anti Korrupsaun, Komisaun Funsaun Publika no PDHJ no Inspesaun Jerál Estadu.

Tanba kuandu laiha sistema ida ne’ebé regula maka fásilmente obriga ema ho ninia interese hodi bele hamosu irregularidade iha prátika administrasaun publika.

“Tanba ne’e maka sistema ne’e introdús ho objetivu ida primeiru hakarak atu halo dezburokratizasaun ba ita nia prosesu. Ita lakohi utiliza prosesu manuál más depois finalmente ita hakarak aselera prosesu balu tanba prosesu manuál maka halo servisu ne’e la’o atraza. Segundu mak prosesu ne’ebé maka ita halo kuandu ita halo ho manuál ninia kontabilidade to’o finál ita labele halo tanba ita sei halo rekonsiliasaun ba relatóriu balu ne’ebé sei halo manuál, entaun susar tebes atubele prodús relatóriu ida ho kualidade”, dehan Januário.

Diretora Nasionál Monitorizasaun Jestaun Patrimóniu Estadu, Timotea Marques, hateten hakarak introdús sistema eletrónika ba servisu hothotu ofisina nasionál nian atu nune’e bele kontrola prosesu servisu sira hotu bele iha efisiénsia ba atendimentu, transparénsia no kontabilidade.

“Sistema ne’e sei rejista ba veíkulu Estadu nian ne’ebé maka tama mai atu halo manutensaun. Hahú hosi karreta tama, tipu karreta, no sasán saida maka atu uza hodi halo manutensaun, prosesu hotu ho eletróniku”, katak Diretora Nasionál ne’e.

Partisipa iha serimónia lansamentu SION ne’e mai hosi Adjuntu Komisáriu Komisaun Anti Korrupsaun, Augusto da Costa Castro, Komisáriu Komisaun Funsaun Públika Asuntu Disiplinár, António Freitas, reprezentante Gabinete Prezidénsia Repúblika, líder Ministériu Finansa balu, no  funsionáriu DNMJPN.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here