Deputadu Bankada FRETILIN, Marito Mota. Imajen Tatoli/Evaristo Soares Martins

DILI, 8 outubru 2019 (TATOLI)–Prezensa Amu Papa João Paulo II iha Timor-Leste, 12 outubru 1989, hanesan oportunidade osan-mean ba foinsa’e sira.

Deputadu Bankada FRETILIN, Marito Mota, ne’ebé altura ne’ebá involve mós organiza manifestasaun dahuluk iha chegada Amu Papa nian iha Tasi-Tolu, katak molok Amu Papa vizita iha 12 outubru 1989, joven sira konsidera integrasaun ne’e mak dalan loos, tanba joven sira la unidade iha momentu ne’ebá.

Maibé, manifestasaun iha 12 outubru, loke ba mundu no loke ba joven sira iha Timor laran tomak katak Indonézia tama territóriu Timor-Leste ho dalan invazaun, entaun hosi ne’ebá kedas komesa loke joven sira hotu nia hanoin ba ukun rasik-aan.

“Iha momentu ne’ebá, hanesan oportunidade osan-mean. Joven sira aproveita loke spanduk ne’ebé hakerek ho linguajen polítika (rejeita integrasaun) atu hatudu ba Amu Papa katak Timor la aseita integrasaun. Tanba ne’e mak iha momentu ne’ebá iha grupu ki’ik-oan ho joven lubuk ida inklui mós ha’u SMA kelas 2 ona. Hosi ne’ebá, joven sira komesa unidade ona no iha ona hanoin katak integrasaun ne’e la loos. Luta ba ukun rasik-aan mak loos liu”, nia haktuir ba Agência TATOLI, tersa ne’e, relasiona ho Komemorasaun Tinan 30 Vizita Amu Papa iha Timor-Leste (12 outubru 1989-12 outubru 2019).

Nia hateten, situasaun ida mak bainhira selebra Tinan 20 Loron Referendum, oinsá Estadu atu tau importánsia mós ba Tinan 30 Vizita Amu Papa iha rai Timor.

“Tanba vizita ida-ne’e mak loke mundu nia matan no loke mós joven sira-nia neon katak prezensa Indonézia ne’e la loos. Entaun, hahú funu hosi vila, joven sira komesa harii unidade nasionál. Tanba ne’e, selebrasaun ida-ne’e Governu tenke tau importánsia másimu. Loron ne’e mak loke mundu nia matan”, katak nia.

Nia haktuir tán, hafoin Amu Papa nia vizita, klandestina mós hahú tama iha Dili laran hodi fó orientasaun ba organizasaun oioin hanesan grupu ka estudante Externato Balide komesa organiza joven sira ne’ebé iha konfiansa. Grupu oan ne’e hatudu ba mundu katak prezensa Indonézia nian iha Timor ne’e invazaun ida, la’ós integrasaun”, nia esplika.

Marito informa, vizita Amu Papa ne’e hatudu ba mundu katak Igreja Katólika iha momentu ne’ebá la tama iha Majelis Agung Wali Gereja Indonesia (MAWI).

“Ne’e mak vizita Amu Papa nian ba iha Flores entaun Amu Papa direta mai iha Timor tanba iha altura ne’e Timor responsabiliza hela ba iha Roma Katólika. Ita iha Amu Papa nia okos. Ne’e mak pontu importante tebes atu Estadu no Governu tau konsiderasaun”, nia haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here