Prezidente Konsellu Impresa, Virgilio Guterres no Sekretáriu Estadu Ambiente, Demétrio do Amaral de Carvalho, asina nota kooperasaun ba asuntu ambiente. Imajen/Florencio M. Ximenes.

DILI, 08 outubru 2019 (TATOLI) – Sekretáriu Estadu Ambiente no Konsellu Imprensa (KI) hetan apoia orsamentu husi projetu kapasidade dezenvolvimentu tranzversál ka cross cutting capacity development,  hodi kapasita jornalista sira atu foku kobertura ba asuntu ambientál iha Timor-Leste.

Semináriu Jornalizmu “Salva Ambiente” ne’e ho objetivu atu hasa’e jornalista sira-nia koñesimentu kona-ba asuntu meiu ambiente, mudansa klimátika no polítika sira relasiona ba kobertura mídia ba prodús notísia ida akuradu, balansu, liuhusi imprime, radiodifuzaun no online.

“Kada redasaun mídia no jornalista iha papél importante atu salva ambiente liuhusi imi-nia deskreve, eduka no diverte ba asuntu ambiente sira iha Timor-Leste”, Sekretáriu Estadu Ambiente (SEA), Demétrio do Amaral de Carvalho, iha ámbitu loke semináriu Jornalizmu : Salva Ambiente iha Otél Timor, ohin.

Tanba ne’e, nia husu ba jornalista sira ne’ebé partisipa semináriu ne’e atubele uza oportunidade di’ak hodi kobre no foku ba asuntu ambiente iha publikasaun loroloron.

“Ha’u espera treinamentu ne’e jornalista sira hahú dedika aan grupu jornalista ambiente, bele servisu hamutuk halo kobertura tanba haree ba polítika redasaun durante ne’e ladún fó importánsia ba asuntu ambiente”, katak.

Iha fatin hanesan, Prezidente Konsellu Imprensa (KI), Virgílio da Silva Guterres, dehan semináriu ne’e atu hasa’e abilidade kada jornalista nian atu haluan área kobertura ba asuntu ambientál.

Issue meiu ambiente kontinua sai preokupasaun globál, mas ita-nia notísia dala barak la hakerek,  tan ne’e KI hala’o semináriu ne’e atu  mídia sira haluan área kobertura ba issue ambiente tanba fó risku diretamente ba ema nia vida”, Prezidente KI sujere.

Nia mós husu ba kada redasaun ba mídia sira atu hahú foka ona issue ambientál atubele fó informasaun ba abitante sira.

Reprezentante Programa Nasaun Unida ba Dezenvolvimentu (PNUD) Timor-Leste, Munkhtuya Altangerel, afirma presiza duni mídia sira iha Timor-Leste atu habelar área kobertura iha área ambiente, maibé ho tarefa verifikasaun, konfirmasaun no klarifikasaun.

“PNUD nia kooperasaun ho KI hodi hasa’e kapasidade no koñesimentu jornalista nia atu haluan kobertura ka foku ba meiu ambiente iha Timor-Leste”, afirma.

Aléinde ne’e, KI no SEA asina nota kooperasaun atu hametin servisu no kobertura ba asuntu ambiente iha Timor-Leste.

Semináriu Jornalizmu : Salva Ambiente ne’e hala’o durante loron haat hahú 8 to’o 11  outubru ne’ebé partisipa husi mídia online, imprime no Rádiu inklui Televizaun nasionál sira iha Timor-Leste.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here