DILI, 08 outubru 2019 (TATOLI)-Liu husi kongresu nasionál ba loron da-ruak, ohin, kongresista sira ba Asosiasaun Feto Distritu Dili (AFEDIL) aprova ho unanimidade muda naran ba fali AFEMDIL (Asosiasaun Feto Munisípiu Dili).
Notísia Relevante : MSSI Apoia no Suporta AFEDIL
Kongresista sira nu’udar feto potensiál Munisípiu Dili nian aseita muda naran tanba mós bazeia ba Dekretu Lei ne’ebé muda tiha ona distritu ba munisípiu.
Presidente AFEDIL, Delfina F. Da C. Simões hatete, momentu ne’ebá ne’e tau naran AFEDIL tanba sei distritu, maibé agora muda ba AFEMDIL tanba distritu sira muda ona ba munisípiu, katak tuir Lei distritu la eziste ona.
Sira mós aprezenta rekomendasaun sira ba órgaun soberanu hanesan Parlamentu Nasionál ho Governu atu, liu-liu inter ministeriál sira atu haree ho sériu ba solusiona problema sosiál, edukasaun no saúde ne’ebé povu ein-jerál enfrenta.
“Nune’e problema hirak ne’e ami nia grupu sei rekomenda ba parte Ministériu relevante sira,” hateten delegada Salustiana M.D. Ximenes.
Liu husi diskusaun, aprovasaun no aprezentasaun paralelu deside temátiku haat hetan aprovasaun unanimidade final global hanesan plataforma asaun ba AFEMDIL.
Jornalista : Osório Marques
Editór : Francisco Simões
