Merkadu Motaain ne'ebeé Governu harii iha tinan 2017 maibé abandonadu tiha de'it. Imajen/António Gonçalves.

BATUGADE, 07 outubru 2019 (TATOLI)-Iha  Governu Konstitusionál da-hitu nia mandatu,   Ministériu Turizmu Komérsiu no Indústria (MCIA-sigla Portugés) konstrui ona merkadu tradisionál iha fronteira terrestre Motaain, Postu Administrativu Balibo, Munisípiu Bobonaro, ho intensaun komersiál bele fasilita komunidade sira iha liña fronteira Timor-Leste ho Indonézia halo tranzasaun merkadoria.

Ironia. Merkadu ne’ebé harii ho sakrifisiu orsamentu povu nian  la funsiona ho di’ak “abandonadu” no la iha nia sustentabilidade to’o ohin loron. Ho nune’e, Xefe Suku Batugade, Januário Moises, husu ba Governu atuál ne’ebé lidera husi Primeiru-Ministru (PM), Taur Matan Ruak, atu bele re-funsiona fali merkadu ho nia fasilidade ne’ebé estabelese nanis ona iha tinan 2017.

Xefi Suku Batugade, Januario Moises. Imajen/António Gonçalves

“Hanesan autoridade lokál ami sujere ba governu  kria  ona fatin no hadi’a kondisaun ne’ebé di’ak  atu bele re-ativa  bazar fronteira para fasilita komunidade iha liña fronteira,” hateten Januário Moises, ohin, ba Ajénsia TATOLI iha Batugade, Bobonaro.

Iha tinan 2017, depois MKIA reabilita, autoridade lokál ne’e mós asiste serimónia termu entrega husi kompañia ba Governu no promete atu re-implementa polítika governu da-neen, maibé mosu impase polítika hodi impede prosesu ne’e to’o ohin loron.

“Husi MCIA diresaun munisípiu ho nasionál  rasik momentu ne’ebá  rekolla naran negosiante sira atu okupa merkadu, maibé laiha kontinuasaun no abandona tiha de’it,” Januário Moises hateten.

Nia tau esperansa boot ba Governu da-ualu ne’e atu bele konsidera asuntu ne’e hodi re-ativa merkadu fronteira para fasilita hadi’a ekonomia povu sira nian iha liña fronteira.

Governu konstrui ona merkadu refere ho sala purvolta 20 resin, tenda provizóriu ba loke ristorante,  maibé maioria abandona tanba la okupa no balun okupa husi negosiante  ho eskalaun negósiu ki’ik.

Governu Timor-Leste ho Indonézia iha tinan hirak liubá iha ona konkordánsia atu loke bazar baratu iha fronteira hodi fa’an produtu lokál husi nasaun ida –idak, maibé to’o ohin la implementa ho di’ak.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here