DILI, 05 outubru 2019 (TATOLI) – Povu Iliomar, Anacleto Mafa, preukupa ho kondisaun estrada iha Postu Administrativu Iliomar, Munisípiu Lautém tanba difikulta movimentu populasaun.
“Imi mak haree rasik ba estrada sira oinsá. Ami mak ko’alia de’it orsida ema la fiar. Nune’e mós bee-moos, imi mak haree ba. Susar tebes mai ami povu Iliomar maski ita ukun-aan tinan 20 ona”, tenik Anacleto ba Agência Tatoli, iha Iliomar, sábadu ne’e.
Nia dehan, maioria populasaun barak iha Iliomar mak moris hanesan agrikultór maibé labele lori ba merkadu tanba kondisaun estrada la di’ak.
“Iha ne’e populasaun maioria halo toos, kuda modo, aifuan no seluk-tan. Maibé labele lori ba merkadu tanba estrada aat loos no bainhira tempu udan ne’e aat liu. Kareta sira ne’ebé mai só ema barani mak liu tanba kondisaun estrada”, nia akresenta.
Nia dehan tan, kona-ba bee-moos, komunidade tenke la’o dook iha foho leten mak foin bele kuru, tanba ne’e nia husu ba Governu tenke tau-matan mós ba sira.
“Ami la husu buat barak ba Governu. Maibé ami só husu de’it mak estrada, bee-moos no eletrisidade tanba bainhira estrada di’ak ami bele lori ami-nia produtu sira ba fa’an no eletrisidade atu ami mós sente naroman hanesan fatin sira seluk ne’ebé naroman”, Anacleto Mafa subliña.
Jornalista: Hortençio Sanchez
Editór: Xisto Freitas
