Prezidente ANPM Gualdino da Silva. Imajen/Tatoli.

DILI, 04 outubru 2019 (TATOLI) – Estadu Timor-Leste liuhosi Autoridade Nasionál Petróleu no Minerál (ANPM) hala’o ona negosiasaun ho Governu Austrália no kompañia sira hodi finaliza konseitu dezenvolvimentu Greater Sunrise (GS).

Hafoin Governu Timor-Leste no Austrália troka nota diplomátika kona-ba tratadu fronteira maritima no entra ein vigór iha loron 30 agostu 2019.

“Ba kampu Greater Sunrise agora ita halo ona kontaktu ho Austrália no kompañia sira inklui TIMOR GAP atu dentru fulan neen nia laran ne’e ita komesa ona finaliza rejime kontratuál no fiskál úniku ba projetu Greater Sunrise”, Prezidente Autoridade Nasionál Petróleu no Minerál (ANPM), Gualdino da Silva, iha Sentru Konvensaun Dili, ohin.

Gualdiano da Silva dehan ANPM mak lidera negosiasaun ne’e no partisipa direita mós husi TIMOR GAP nu’udar kontraktor atu prepara planu no finaliza ba konseitu dezenvolvimentu nasionál.

“Ami ANPM lidera negosiasaun ne’e no sei finaliza iha tinan oin (2020) ba konseitu Dezenvolvimentu ba Greater Sunrise”, katak.

Timor-Leste no Austrália tenke hala’o negosiasaun duni hodi iha konkordánsia mak bele hala’o esplorasaun ba kampu Greater Sunrise tanba median line ne’ebé fahe fronteira, kampu ne’e balun tama iha área jurizdisaun Timor-Leste.

Iha prosesu negosiasaun antes ne’e, Greater Sunrise dada mai Timor-Leste sei afavór porsentu 70 no Austrália hetan porsentu 30 no dada ba Austrália afavór porsentu 20 no ba Timor-Leste porsentu 80.

Antes ne’e, Negosiadór Prinsipál ba asuntu Fronteira Marítima, Xanana Gusmão husu ba públiku atu lalika dúvida ona tanba kadoras Greater Sunrise pozitivu ona dada mai iha Timor-Leste.

“Ha’u sente kontente tanba apezar de 20 anos de’it mós ita halo buat balun, rai barak ukun aan kle’ur ona, ha’u bá vizita sira aat liu ita , ne’ebé ita sente katak di’ak no ita kontinua la’o neneik ho esforsu maka’as ho vontade atu serví labele lakon”, katak.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here