Prezidente Empreza Estatál Timor-Leste, TIMOR GAP, EP, Francisco Monteiro. Imajen/Tatoli.

DILI, 04 Outubru 2019 (TATOLI) – Prezidente TIMOR GAP, EP, Francisco Monteiro, informa iha 2020, hamutuk ho Kompañia Timor Resources halo perfurasaun ba mina-matan lima iha rai-maran iha área Suai-Kovalima no Betanu-Manufahi nian.

“Tinan oin, ami hamutuk ho Timor Resources halo perfurasaun bloku lima ne’ebé bloku tolu uluk iha Suai hafoin susesu hotu bele kontinua bloku rua iha Betanu”, Prezidente Timor GAP informa iha Sentru Konvensaun Dili, ohin, iha ámbitu Simeira Internasionál Mina no Gás.

Kona-ba iha offshore (tasi-laran), Francisco Monteiro friza bloku tolu iha TIMOR GAP nian liman mak eskluzivu 100% hanesan operadór identifika ona perspetiva para iha futuru bele konvida parseiru sira ka operadór petrolífera sira.

Nune’e, nia dehan Simeira Internasionál ne’e importante tebes atu hatudu ba kompañia no investidór poténsia ba mina no gás bainhira iha interese bele halo parseiru (joint venture) ho TIMOR GAP atu hala’o esplorasaun iha futuru.

“Atu halo perfurasaun ne’e karun, ne’ebé tenke atrai ema seluk mai tau osan hamutuk para bele halo perfurasaun ida ne’e iha bloku eskluzivu nian”, katak.

Bloku lima ne’e hahú iha 2017, halo peskiza jeolójiku sira no estudu sira seluk no iha outubru 2018 hala’o teste sízmiku sira iha Bloku A. Empreza uza ona sistema vibroseis, alternativu ida kontroladu hosi teste sízmiku sira. No Bloku C hala’o ona teste sira iha outubru iha zona Betanu (entre Alas ho Hatudu) no teste vibroseis sira.

“Infraestrutura bázika importante tebes, ne’ebé ami-nia parseiru Timor Resources ko’alia ona bele prodús lalais iha tinan ida ou rua nia laran kuandu haree ba pozitivu contain mina”, haktuir.

Nia dehan, planu atuál haree ba perfurasaun tolu to’o lima iha Bloku A. Ida-idak hosi perfurasaun tolu iha ‘shallow-field’, to’o metru 2.000, sei kusta dólar millaun $35.

TIMOR GAP no empreza Timor Resources hein atu hahú iha 2020 nia rohan hala’o perfurasaun dahuluk sira iha fatin tolu to’o fatin lima hosi bloku ida ne’ebé maka iha lisensa hodi halo esplorasaun ho produsaun petróleu nian iha Timor-Leste.

Autoridade Timor GAP ne’e dehan identifika ona fatin tolu iha Bloku A hanesan fatin posivel sira ba perfurasaun sira ne’ebé hein hodi hahú iha tinan ne’e nia rohan ka iha inísiu hosi tinan 2020.

Bloku A iha munisípiu sira Kovalima ho Maliana no Bloku C iha munisípiu sira Manufahi ho Ainaru ne’ebé halo parte ona, iha rejime hosi Kontratu sira Partilla hosi Produsaun nian (PSC), ba Timor Resources Pty Ltd, empreza australiana ida ne’ebé halo parte hosi Nepean Group.

Bloku B haruka ona ba TIMOR GAP Onshore Block, subsidiáriu ida hosi empreza públiku petrolíferu Timor-Leste nian (TIMOR GAP).

Planu inisiál ho tinan hitu ba esplorasaun prévia hosi peskiza tinan rua, hosi tinan daruak ba tinan datoluk hahú ho perfurasaun sira, too tinan haat kompleta estudu hosi kapasidade sira no, hosi tinan lima bá oin, iha posibilidade hahú esplorasaun.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here