Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 04 outubru 2019 (TATOLI) – Governu liuhosi Ministériu Agrikultura no Peska (MAP), husu Governu Japaun liuliu Japan International Cooperation Agency (JICA) atu kontinua apoia Timor-Leste (TL) iha setór agríkola hodi aumenta produsaun hare iha rai-laran.

“Ha’u halo ona enkontru ho Ministru Agrikultura no Peska Japaun nian, atu kontinua fó apoiu mai ita hodi hasa’e produsaun agríkola tanba sira-nia apoiu boot liu iha setór agrikultura”, Ministru MAP Joaquim José Gusmão dos Reis Martins ba jornalista sira iha Komoro, ohin.

Ministru hatutan : “Ha’u ko’alia ho Ministru Agrikultura Japaun nian, oinsá maka sira bele apoia ita nafatin, tanba sistema hasa’e rendimentu produsaun agríkola nian ba foos-rai iha Timor-Leste sei remata tinan oin, tanba ne’e se bele sistema multiplika ba irrigasaun sira iha Karau-Ulun, Webaba no Bebui”.

Tanba sistema ne’ebé JICA halo hanesan irrigasaun Maliana hatudu rezultadu katak hasa’e duni rendimentu produsaun agrikultór sira nian ba foos-rai, oinsá maka sira kontinua ida ne’e hodi bele enkoraja grupu agrikultór sira bele halo produsaun di’ak ba foos Timór.

“Governu Japaun kontente tebes sei ko’alia ho JICA hodi kontinua programa ne’e”, haktuir ministru.

Tanba ne’e, atu hasa’e produsaun agríkola presiza joven sira-nia partisipasaun atu nune’e bele halo diversifikasaun setór agríkola.

“Ita haree joven sira lakohi partisipa iha agrikultura, ita-nia inan-aman balun lakohi halo to’os, maibé hola foos de’it ho osan subsídiu ne’ebé sira iha, atu hasa’e kuantidade produsaun ne’e susar”, ministru dehan.

Jornalista : Natalino Costa 

Editora : Maria Auxiliadora

2 KOMENTÁRIU

  1. Sua Ex_cia mk ami respeita. Atu fo hatene deit a ba ita Katak los duni joventude barak mak lakoi participa iha aktividade agricultura. Maibe ba Mai nebe estuda kona ba area agricultura Triste 😢, tamba formasaun no troenamentu mai ami limita tbs. Hanesan vaga ba census agricultura, iha noticia Dhn husu ba joventude hotu liu liu balun studa iha fakuldade agrikultura hakat ba ida idak nia suku atu prepara dokumentu konkore ba vaga ida ne. Maibe realidade ema nbe mk la htne saida mk seitor agricultura no nia background Laos agrikultura mk liu. Se mk sala ?

  2. Ami Joventude nebe studa iha area agrikultura triste tamba formasaun Mai ami menus, no Ida nebe halo ami triste mk foin ddk vaga ba census agrkultura, iha noticia sr. Ministru htt husu ba jovem htu iha dili atu besik ba ida ida nia suku hodi konkore ba ida liu liu ba Sira nebe studa his fskuldade agrikultura, maibe relaidsde Hili familia deit, ema nebe Laos backroung ba agrikultura mk liu bsrsk kompara ho ami. Triste tebes 😓

HAKEREK NO HATÁN

Please enter your comment!
Please enter your name here