Cristina Aleixo Mendonça, aluna ne'ebé sai Prezidente Repúblika durante oras ida iha Palásiu Prezidente Nicolau Lobato. Imajen Tatoli/Cipriano Colo

DILI, 4 outubru 2019 (TATOLI)–Cristina Aleixo Mendonça, asume kargu nu’udar Prezidente Repúblika durante oras ida nia laran iha Palásiu Prezidente Nicolau Lobato, 4 outubru 2019.

Cristina asume kargu ne’e nu’udar parte hosi inisiativa globál “Labarik Asume Kna’ar” ne’ebé hala’o iha nasaun 130.

Iha oras ida nia laran, Prezidente Repúblika, Francisco Guterres Lú Olo simbólikamente entrega kna’ar ba Cristina Aleixo Mendonça atu asume hikas nu’udar ‘Prezidente Repúblika’.

Iha tuku 9:00 otl, Cristina hala’o kna’ar hanesan “Prezidente Repúblika” ne’ebé akompaña ofisiálmente hosi seguransa pesoál no batedór husi nia rezidénsia to’o Palásiu Prezidente Nicalau Lobato.

Bainhira to’o iha Palásiu Prezidente Bairru Pité, Cristina simu husi Xefe Kaza Sivíl, Francisco Maria de Vasconselhos no Adjuntu Xefe Kaza Militár, Superintendente Eugénio Pereira iha portaun entrada to’o nia gabinete.

Durante iha nia gabinete, Cristina Aleixo Mendonça dirije enkontru ho Xefe Kaza Sivíl no Adjuntu Xefe Kaza Militár.

Hafoin enkontru, Cristina espresa ninia sentimentu nu’udar Prezidente Repúblika durante oras ida nia laran katak nia sente orgullu tanba hetan oportunidade osan mean ida-ne’e.

“Ha’u orgullu tanba asume kargu nu’udar Prezidente Repúblika durante oras ida nia laran. Durante oras ida, hanesan Prezidente Repúblika, hamutuk ho Xefe Kaza Sivíl no Organizasaun Feto sira, ko’alia kona-ba importánsia feto iha área dezenvolvimentu Timor-Leste”, Cristina haktuir.

Hafoin ko’alia ba mídia, Korpu Seguransa Pesoál no batedór sira akompaña Cristina Aleixo Mendonça hodi lori hikas fila ba nia rezidénsia.

Cristina Aleixo Mendonça hosi Aldeia Urahou, Suku Maubisse, Postu Administrativu Maubisse, Munisípiu Ainaro.

Oras ne’e, Cristina hanesan estudantes segundo ano iha Eskola Sekundária Santo Inácio de Loyola Maubisse, ho idade 16.

Iha fatin hanesan, Asesora ba Asuntu Igualdade Jéneru hosi PLAN International, Angelina de Araújo esplika katak kada tinan PLAN International sempre realiza kampaña boot ida hanaran “Tanba ha’u Labarik Feto”, ne’ebé inísia dezde tinan 2012 to’o agora.

Nia dehan, tinan kotuk, PLAN International mós realiza programa ne’e no iha tinan 2017 realiza programa ida liliu kampaña kona-ba “Labarik Feto ho Igualdade”, no tinan ne’e organiza labarik sira hosi área rurál mai iha fatin ida ne’e hodi foti pozisaun nu’udar Prezidente Repúblika durante oras ida, iha ámbitu selebrasaun Loron Internasionál Labarik Feto ne’ebé sei realiza iha loron 11 outubru tinan ne’e.

Angelina relata kona-ba PLAN International nia serbisu iha área rurál, ne’ebé halibur labarik sira mai hosi parseiru PLAN International rasik, liliu benefisiáriu diretamente ba iha treinamentu, formasaun iha komunidade nia leet.

Kona-ba selesaun ne’e, nia esplika, PLAN International sempre fó formasaun, atu kapasita labarik feto sira oinsá mak bele iha kapasidade di’ak, ko’alia di’ak no seluk-tan.

Asesora ne’e subliña, tuir PLAN International nia haree katak labarik sira ne’ebé hetan oportunidade ba formasaun, hotu-hotu iha kualidade tanba prenxe buat hotu ne’ebé mensiona, nune’e kada tinan halo de’it rotasaun. Katak, sé mak hetan oportunidade, nia mak asume pasta nu’udar Prezidente Repúblika durante oras ida, hanesan Cristina hosi Maubisse.

Objetivu hosi programa ne’e, nia esplika, PLAN International hakarak atu orienta labarik feto sira, liliu sira ne’ebé hetan ona oportunidade hodi asume kargu nu’udar Prezidente Repúblika oras ida nia laran, sei hakerek ninia esperiénsia ida ne’e no sei fahe ba públiku atu bele inspira labarik feto hotu iha Timor-Leste, oinsá luta ba prosesu dezenvolvimentu iha rai ne’e, liliu oinsá sai hanesan líder iha futuru.

Kona-ba programa ne’e, Angelina hateten, Prezidente Repúblika, Francisco Guterres Lú Olo fó apoiu tomak hodi apela ba líder mundiál no ema hotu-hotu iha nasaun ne’e garante saúde, edukasaun no fó protesaun ba labarik hotu.

Jornalista: Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here