Ministra Finansa Ein Funsaun, Sara Lobo Brites, akompaña hosi partisipante sira buti butaun hodi lansa portál Autoridade Tributária nian, iha Ministériu Finansa, Aitarak-Laran, Sesta(4/10/2019). Foto: Media MF.

DILI, 04 outubru 2019 (TATOLI)– Ministériu Finansa (MF) liuhusi Autoridade Tributária Timor-Leste (ATTL) estabelese portál ida ho sistema impostu liuhosi prestasaun servisu online hodi hasa’e reseita doméstika iha tinan lima mai.

Diretora Jerál ATTL, Mónica Rangel da Cruz, hatete sistema ne’e sei ajuda tebes ba empreza sira bainhira atu submete relatóriu no selu impostu iha Autoridade Tributária.

“Ha’u hakarak dehan reforma fiskál ne’ebé Governu trasa ona ho objetivu atu hasa’e reseita doméstika ba tinan lima mai, indikadór prinsipál ida ne’ebé atu atinje objetivu maka presiza hadi’a sistema impostu liuhosi prestasaun servisu online ne’ebé atu implementa liuhosi portál ATTL hodi halo submisaun formuláriu impostu eletróniku”, Mónica Rangel da Cruz iha lansamentu portál ATTL ne’ebé realiza iha MF Aitarak-Laran, ohin.

Hodi dehan asaun ida ne’e hanesan faze dahuluk atu hahú hodi realiza meta ida hosi reforma fiskál ida ne’ebé atu moderniza sistema impostu no hadi’a administrasaun impostu ida simples hodi redús kustu no mós rekursu.

Diretora Jéral Autoridade Tributaria-Ministériu Finansa, Mónica Rangel da Cruz. Foto: Media MF.

Diretora Jerál ne’e hatutan durante ne’e Banku Nasionál Ultramarinu (BNU) mak suporta hodi fó prestasaun servisu ba pagamentu impostu besik tinan 20 nia laran.

Biban ne’e, Mónica Rangel da Cruz mós hakarak partilla katak portál ida ne’e iha espesifikasaun téknika ba portal AATL, primeiru maka nia hosting no seguransa, no host iha servidór Governu nian no ne’e hanesan pasu ida pozitivu tebes hodi mantén seguransa dadus tanba Governu mak na’in ba servidór ne’e rasik.

“Iha dezempeñu ka velosidade hosi portál ida ne’e ami bele dehan katak besik porsentu 85 ne’ebé hetan teste hosi international service provider, Timor Telekom no Telkomcel. Ida ne’e di’ak tebes tanba bele atrai vizitante barak tanba imajen di’ak tebetebes. Asesibilidade ba portál ida ne’e hetan asesu liuhosi meiu eletróniku hanesan laptop, telefone ka mobile phone no tablet”, Mónica esplika.

Nia hatutan espesifikasaun tékniku ba E-Service ne’ebé ba E-Filing, E-Payment no E-Reporting ne’ebé sei implementa iha futuru depois upgrade ona ba iha sistema sigtas versaun tolu, nia velosidade sei ótimu, katak bele asesu kuandu internét low ka slow.

Teknolojia ne’ebé suporta eskalabilidade katak bele muda karik iha rekizitu foun ruma, bele asesu mós liuhosi meiu eletróniku hanesan telefone, tablet, no desktop ida ne’e fásil tebes atu submete dadus hodi manda ba Autoridade Tributária (AT) hosi kontribuinte sira-nia serbisu fatin ou iha ne’ebé de’it bele asesu internét.

“Ha’u hakarak dehan E-Service ne’e sei efetivamente hahú aplika iha tinan 2020. Agora, iha prosesu preparasaun hanesan treinamentu, utilizasaun, nune’e kontribuinte sira hotu bele familiariza ho sistema E-Service ne’ebé sei implementa. Iha prosesu faze implementasaun ida ne’e, atu hahú uluk maka E-Service ne’ebé kontribuinte sira sei hahú haruka formuláriu liuhosi kualkér maneira ne’ebé iha asesu internét sein hodi surat-tahan ba AT”, katak.

Iha futuru kuandu implementa ona E-Payment, depois inkorpora hamutuk ho sigtas versaun tolu, sei haree espesífiku ba kontribuinte hosi impostu petrolífera nian. Tanba ne’e iha faze implementasaun E-Service ne’e iha faze tolu, maka E-Filing, E-reporting katak depois selu bele haree relatóriu osan hira maka selu ona ba Estadu no E-Payment maka agora sei iha prosesu.

Mónica esklarese liután, benefísiu hosi E-Service ne’e rasik atu garante transparénsia ba parte rua (AT no Kontribuinte) ka empreza sira tanba bele haree no asesu dadus no informasaun impostu nian ne’ebé maka submete online, minimiza kustu no tempu inklui osan no enerjia ba kontribuinte bainhira submete formuláriu impostu.

Reprezentante Empreza CC Bussiness Sulutions Lda, Mónica Graziela Guterres, dehan sistema ne’e sei ajuda tebes sira-nia servisu, nune’e labele forma tan iha banku hodi prosesa ba relatóriu pagamentu impostu nian.

“Nu’udar timoroan orgullu tebes tanba la’ós rai seluk de’it maka bele uza E-Service ba ninia pagamentu ba buat hotu, maibé timoroan mós iha ona pasu ida kapás tebes E-service iha taxa”, afirma.

Ho servisu eletróniku ne’e bele redús tempu, tanba durante ne’e kuaze gasta de’it hodi bá selu impostu tanba buat hotu manuál, no agora ho sistema foun ne’e bele ajuda, katak bele halo relatóriu online de’it.

Iha prosesu lansamentu ne’e, ATTL hili empreza haat sai hanesan ezemplu maka Lita Store, CC Business Sulutions Lda, Viettel Timor Unipessoal, Lda, no Maharlika International.

Atu asesu ba portál ATTL ne’e maka klik www.attl.gov.tl.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here