Ospitál Referál Suai. Foto TATOLI: Eugenio Pereira.

COVALIMA, 01 outubru 2019 (TATOLI) – Ospitál Referál Suai, Munisípiu Covalima prevene moras sira liuhusi jestaun ambiente saudável no hetan kategória “Eselente” tanba hakarak salva ema hotu liuliu pasiente sira husi moras ne´ebé sira hetan.

“Ami kria jestaun ida ne’e tanba ospitál nudar sentru saúde ne’ebe halibur ema di´ak no ema moras sira atu moris iha ambiente saudável no konfortável,” dehan Diretór Ezekutivu Ospitál Referál Suai, Bernadino Armando da Silva ba Ajénsia TATOLI, iha Ospitál Suai, tersa (01/10/2019).

Diretór Ezekutivu Ospitál Referál Suai, Bernadino Armando da Silva. Foto TATOLI: Eugenio Pereira

Nia esplika, jestaun ne’e sira kria atu tulun ema hotu tanba ospitál halibur ema oioin tanba ne´e atu garante kondisaun saúde  ema nian sira kria iha ambiente ida seguru.

“Ami lakohi husik hela imajen la di´ak tanba ambiente ospitál la diak. Ita kria kondisaun di´ak atu evita prevensaun kontaminasaun. Labele halo fali ema di´ak sai moras hotu no ema ne’ebé moras simu tan moras seluk, ida ne’e ami lakohi,” friza Diretór Bernadino Armando da Silva.

Médiku ne´e esplika tan katak sentru saúde ka ospitál tenke iha ambiente di´ak atu nune’e sirkulasaun anin ne’e espalla, bele iha kondisaun fresku atu nune’e bele garante nafatin kondisaun saúde  pasiente, família no pesoál saúde sira nian.

Nia haktuir, husi jestaun sira ne’e hotu, ninia parte ejize maka´as ba kompañia limpeza atu loro-loron kontrola ambiente husi li´ur to´ sala laran, tenke moos nafatin durante oras 24.

“Atividade ne’e sai ona tradisaun ida. Ne’e duni kualker pasiente, sese de’it iha obrigasaun atu kuidadu kondisaun ospitál nian,” tenik Diretór Bernardino  A. da Silva.

Entretantu, ambiente Ospitál Referál Suai, Covalima, tuir observasaun Ajénsia TATOLI katak jeralmente moos tanba lixu sira haloot no organizadu tuir idaidak nia fatin.

Aredór ospitál nian kuaze enfeita ho ai-funan buras sira ho funan oioin no motor kareta sira estasiona tuir idaidak nia parajen no kontroladu.

Ambiente ospitál nian mós, hahú husi portaun mai to´o sala espera ospitál nian organizadu no morin inklui monta avizu kona-ba oinsá proteje ambiente saudável, informasaun kona-ba kuidadu no prevensaun ba moras kontajioza no naun-kontajioza sira.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here