Prezidente Rede Feto Timor-Leste, Judite Dias Ximenes, hlao entrevista ho jornalista sira. Imajen/Dok.TATOLI

DILI, 3 setembru 2019 (TATOLI)–Rede Feto Timor-Leste atualiza preparasaun Kongresu Nasionál nian ba Prezidente Parlamentu Nasionál (PPN), Arão Noé de Jesus da Costa Amaral.

“Rede Feto atualiza kongresu nasionál ne’ebé sei realiza iha 22-23 setembru tinan ida ne’e hodi prodúz plataforma foun ba feto Timor-Leste”, Prezidente Rede Feto, Judite Dias Ximenes, ko’alia ba jornalista sira hafoin hasoru malu ho Prezidente Parlamentu Nasionál, Arão Noé,  iha Parlamentu Nasionál, kinta ne’e.

Komitiva Rede Feto kompostu hosi reprezentante Organizasaun Naun Governamentál sira hanesan Ba Futuru, PRADET, Fundsaun ALOLA, APSC-TL, Feto Hadomi Família (FHF) no Action For Change (AFC).

Objetivu Rede Feto hasoru Prezidente Parlamentu Nasionál, Arão Noé hodi husu apoia morál no polítika ba iha plataforma foun ne’e ne’ebé sei prodúz liuhosi Kongresu Nasionál.

Nune’e mós, Rede Feto husu Parlamentu Nasionál tau prioridade ba programa feto nian iha orsamentu 2020.

Judite hatutan, daudaun ne’e Rede Feto ba iha munisípiu 12 no mós Rejiaun Administrativa Espesiál Oé-Cusse Ambeno (RAEOA) identifika prioridade sira kona-ba feto no família sosiedade Timor nian.

Nia subliña, proposta Rede Feto nian ba orsamentu 2020 ho montante rihun atus-lima, la inklui membru organizasaun sira ne’ebé hamahan-aan iha Rede Feto. Membru organizasaun sira ne’ebé rejista iha Rede Feto hamutuk 37, tanba ne’e organizasaun ida-idak ho nia prioridade rasik.

Nia husu ba Governu atu hamosu orsamentu determinante ida, nune’e Rede Feto bele halo serbisu ho di’ak.

“Ohin, ami husu ba Prezidente Parlamentu Nasionál no Prezidente indika katak bele, maibé deputadu sira mak tenke iha inisiativa hodi halo proposta ba mudansa alterasaun orsamentu Estadu. Prezidente mós dehan transferénsia públika ba tinan oin ne’e boot. Tanba ne’e, ami husu deputadu sira, se hakarak Rede Feto serbisu ho másimu, entaun fó prioridade tanba ami-nia proposta sei tama mai”, katak nia.

Judite subliña, prioridade Rede Feto nian ba 2020 mak hanesan saúde, edukasaun, ekonomia, seguransa, justisa, vida polítika, feto rurál, inkluzaun sosiál no halo advokasia iha asuntu hotu-hotu ligadu ba feto nia interese.

“Prezidente Parlamentu kontente ho plataforma ida ne’e tanba aplikável. Plataforma sira uluk ne’e, ita ladún identifika prioridade”, nia esklarese.

Nia esplika, plataforma atuál ida ne’e sei identifika loloos prioridade, katak iha suku ida ka aldeia ida ne’e iha problema hanesan ne’e. Nune’e mós, iha fatin ida ne’e, veterana ida hasoru problema hanesan ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here