Imajen espesiál.

DILI, 03 outubru 2019 (TATOLI) – Autoridade Nasionál Petróleu no Minerál (ANPM) serbisu hamutuk ho empreza Petróleu IN-VR, ohin, realiza Simeira Internasionál kona-ba Mina no Gás no Lansamentu Segunda Ronda ba Kontratu Fahe Produsaun.

Lansamentu ne’e hala’o iha Sentru Konvensaun Dili ne’ebé mak sei kontinua kedan ho konferénsia durante loron rua (3-4 outubru) ne’ebé dedikadu ba aprezentasaun tékniku detalladu sobre prova sira potensialidade idrokarbonetu, kontratu, fiskál, lejizlasaun no rejime Regulatóriu ba esplorasaun no exploitasaun rekursu petróleu no prosesu rejistu iha rai-laran.

Simeira ne’e sei loke ofisiálmente husi Primeiru-Ministru (PM), Taur Matan Ruak, no hetan partisipasaun husi Reprezentante Espesiál Governu Timor-Leste ba Asuntu Petróleu, Kay Rala Xanana Gusmão, membru Parlamentu Nasionál, membru Governu no investidór internasionál no nasionál inklui korpu diplomátiku sira.

Iha eventu ne’e, Reprezentante Espesiál ba Setór Petróleu Kay Rala Xanana Gusmão, Prezidente ANPM, Dino da Silva, TGS/Spectrum, Geofisical ION no  parseiru indústria importante sei publika informasaun sira kona-ba bloku sira, mudansa termu fiskál, durasaun konkursu no kondisaun sira hafoin konkursu primeira ronda ba área rai-maran no konkursu segunda ronda ba área tasi-laran Timor-Leste nian, internasionalmente loke ba kompañia sira hotu atu kompete. Bloku hamutuk 18 mak sei loke iha konkursu segunda ronda ne’e.

Simeira Mina no Gás ne’e ANPM organiza liuhusi kooperasaun Simeira Reinu Unidu lidera husi IN-VR Oil & Gas no hetan apoia husi Caltech, ConocoPhillips, BGT, TGS/Spectrum, SundaGas, ION Geophysical, TIMOR GAP, Miranda Law Firm, Discover Geoscience ho kompañia boot sira husi nasionál no internasionál.

(ki)

HAKEREK NO HATÁN

Please enter your comment!
Please enter your name here