Prezidente Autoridades Nasional Comunicação ( ANC) João Olivio Freitas. Imajen/Tatoli.

DILI, 03 outubru 2019 (TATOLI) – Prezidente Autoridade Nasionál Komunikasaun (ANC, sigla portugés), João Olívio Freitas, hatete Ceslink seidauk kumpre dokumentu balu ne’ebé ANC husu atubele estabelese hanesan operadór telekomunikasaun iha Timor-Leste .

Tanba ne’e ANC fó ona semana rua ba empreza ne’e atu kompleta dokumentu komprovativu antes ANC deside ba faze téknika nian hodi atribui frekuénsia no númeru telemovel ba Ceslink.

“Bainhira faze primeira ne’e sira (Ceslink) kompleta ona, faze tuir fali mai ita sei haree liu ba rekizitu tékniku nia”, dehan Prezidente ANC ba Ajénsia Tatoli iha Kaikoli, ohin.

João Olívio adianta katak dokumentu ne’ebé Ceslink submete seidauk kompleta maka hanesan estatutu Ceslink rasik, lisensa négosiu husi Servisu Rejistrasaun no Verifikasaun Emprezariál (SERVE) laiha.

Tanba ne’e maka depois ekipa teknika ANC halo tiha verifkasaun ba dokumentu husi kompañia nian ANC haruka kedan karta ba iha Ceslink atu kompleta domentus balun tuir ANC nian rekizitu.

“Ami komunika ona ho sira no ami mós haruka ona karta bá sira ohin hodi fó semana rua tan atu sira kompleta”, dehan João Olívio.

Aléinde ida ne’e, Prezidente ANC relata katak halo ona enkontru ho reprezentante Ceslink nian hodi husu sira atu kompleta dokumentu.

Entretantu, Responsavel Tékniku husi Empreza Ceslink, Moniz Maia, informa preparasaun Ceslink atu sai operadór telekomunikasaun dahaat iha Timor-Leste atinje ona porsentu 95.

“Daudaun ne’e, ami-nia preparasaun ein termu fíziku no teknikamente atinje ona porsentu 95 no ami hein de’it desizaun ANC nian ba atribuisaun ba frekuénsia no númeru telefone bainhira sira atribui ona ida ne’e, Ceslink sei lansa parese iha tinan ne’e, fulan-novembru no dezembru”, dehan nia foin lalais ne’e ba Tatoli iha nia knaar fatin Bidau.

Hodi hatutan preparasaun Ceslink iha Dili laran de’it, tanba bazeia ba enkontru ho Konsellu Ministru foin daudaun ne’e, prioridade maka oinsá konstrui uluk operadór ne’e iha Dili, tanba baze ba operadór Ceslink kapitál sai prioridade.

Bainhira ANC atribui ona frekuénsia no númeru no mós emite ona lisensa ofisiál katak Ceslink bele lansa ona, entaun iha ne’e maka Ceslink sei halo nian expansaun bá munisípiu.

Moniz Maia afirma kona-ba dokumentu komprovativu nesesária sira ne’ebé maka sai hanesan rekizitu prinsipál hodi harii operadór ida, ne’e husi parte Ceslink rasik submete ona dezde iha 21 agostu ba ANC.

Enkuantu ANC halo ona verifikasaun no husu empreza ne’e atu kompleta tan dokumentu ne’ebé sei falta hodi prienxe rekizitu atubele fó linsensa.

Ceslink mak operadór telekomunikasaun primeira husi emprezáriu timoroan ida ne’ebé investe hodi hakarak halo kompetisaun ho operadór tolu ne’ebé eziste uluk ona iha Timor-Leste mak Timor Telecom, Telemor no Telkomcel.

Jornalista : Natalino Costa

Editora : Maria Auxiliadora 

HAKEREK NO HATÁN

Please enter your comment!
Please enter your name here