Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida. Imajen/Evaristo Soares Martins

DILI, 03 setembru 2019 (TATOLI) – Diretór Ezekutivu Sentru Estudu ba Pás no Dezenvolvimentu (CEPAD-sigla portugés),  João Boavida, observa durante ne’e fiskalizasaun Parlamentu Nasionál (PN) kona-ba implementasaun lei no rezolusaun sira ladun másimu.

“Produtividade Parlamentu Nasionál nian ha’u sukat ho kualidade fiskalizasaun ne’ebé sira halo ho baze lei sira ne’ebé prodúz ne’e la’o ka la’o”, tenik Diretór ne’e ba Agência TATOLI, kinta ne’e.

Tuir nia, loloos ne’e orgaun lejizladór sira tenke fiskaliza fali lei no rezolusaun hirak ne’ebé sira rasik mak prodúz, nune’e bele hatene ninia impaktu.

Diretór ne’e kestiona tanba durante ne’e nia la asesu relatóriu ruma hosi uma fukun kona-ba fiskalizasaun lei ne’ebé implementa ona durante tinan barak nia laran.

Nune’e, nia fó hanoin ba Reprezentante Povu sira atu hahú fiskaliza lei sira ne’ebé prodúz ona ho ninia impaktu iha sosiedade.

Entretantu, durante ne’e PN halo ona lei balun hanesan lei ordenamentu territóriu nú.06/2017 iha tinan 2017, rejime jerál ba floresta no.14/2017, lei investimentu privadu no seluk tan.

Iha tinan 2019, PN halo ona alterasaun ba Lei Atividade Petrolífera no Lei Fundu Petrolífera, maibé artigu balun Tribunál Rekursu deklara inkonstitusionál.

Parlamentu mós konsege halo alterasaun ba nomeasaun Prezidente RAEOA nú.3/2014, 18 juñu no alterasaun lei seluk iha 2019 mak lei Rejime Laborál no Migratóriu Espesiál ba Projetu Bayu Undan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here