Administradór Munisípiu Covalima, Afonso Nogueira Nahak. Foto TATOLI: Tomé Amado

COVALIMA, 03 Setembru 2019 (TATOLI)-Autoridade Covalima prevee tetu Orsamentu Jerál Estadu (OJE) (2020) sei sosa komputadór hamutuk 30 hodi apoiu Xefe Suku sira halo servisu atendimentu komunidade sira ne’ebé presiza trata dokumentu ruma.

Administradór Munisípiu Covalima, Afonso Nogueira Nahak dehan, iha OJE 2020 sira prevee osan rihun atus rua ($200) hodi sosa komputadór no fasilidade servisu seluk fó apoia ba xefe suku fazeadamente tuir orsamentu.

“Ba 2020 ita prevee ona orsamentu atu sosa komputadór ba ajuda servisu pesoál administrasaun suku sira hodi fasilita servisu xefe suku sira nian, tanba komputadór ne’e ita sei fó apoia fazeadamente,” dehan Administradór Afonso ba Ajénsia TATOLI iha Munisípiu Covalima.

Nia dehan, komputadór ne’e governu sei sosa liga ba Polítika VIII Governu Konstitusionál atu moderniza servisu administrasaun governu nian tuir Polítika E-Goverment ka Governu Eletrónika.

Autoridade Covalima ne’e husu ba xefe suku atu labele moe bainhira seidauk hatene uza komputadór tenke aprende no husu ajuda ba estudante sira ne’ebé hatene hodi fahe esperiénsia ajuda servisu administrasaun suku.

“Ha’u husu ba xefe suku sira imi tenke aprende mós atu halo servisu utiliza komputadór labele halo relatóriu hakerek de’it, maibé tenke halo relatóriu servisu sira uza komputadór para fasilita imi-nia servisu atende ita-nia komunidade ho di’ak,” nia hatete.

Iha enkontru ne’e xefe suku sira balun mós kestiona kondisaun servisu fatin sede suku balun komesa aat no fatin kloot presiza hadi’a kondisaun.

Ba preokupasaun ne’e, Administradór Afonso rekoñese sede suku balun aat ona, maibé atu hadi’a presiza halo koordenasaun ho Ministériu Administrasaun Estatál (MAE) maka haree direita kestaun ne’e.

Administradór Afonso mós orienta autoridade suku sira oinsá servisu maka´as buka rezolve problema sosiál sira ne’ebé povu hasoru iha baze hanesan tempu bailoro halo bee matan barak maran tenke buka alternativu ajuda povu.

Munisípiu Covalima kompostu husi Administrativu Fatululik ho suku rua, Fatululik no Taroman. Postu Administrativu Fatumean ho suku tolu hanesan Belulik Leten, Fatumea no Nanu. Postu Administrativu Fohorem ho suku haar hanesan Dato Rua, Dato Tolu, Fohoren no Laktos.

Tuir mai, Postu Administrativu ho nia suku haat hanesan Belecasac, Holpilat, Matai no Ogues. Postu Administrativu Suai vila ho nia suku lima hanesan Beco, Kamanasa, Debos, Labarai no Suai Loro.

Postu Administrativu Tilomar kompostu husi suku haat hanesan Casabauc, Foholulic, Lalawa no Mademo. Enkuantu, Postu Administrativu Zumalai kompostu suku ualu hanesan Fatuleto, Lepo, Lour, Mape, Raimea, Tashilin, Usecai no Zulo.

Jornalista: Eugénio Pereira

Editór       : Rafy Belo

HAKEREK NO HATÁN

Please enter your comment!
Please enter your name here