Prezidente Autoridade Nasionál Petróleu no Minerál (ANPM), Gualdino da Silva. Imajen /Tatoli.

DILI, 03 outubru 2019 (TATOLI) – Prezidente Autoridade Nasionál Petróleu no Minerál (ANPM), Gualdino da Silva, hatete hafoin abertura simeira internasionál ne’e durante loron rua (3-4 outubru), ANPM sei hala’o jornada durante fulan neen hodi promove rikusoin Timor-Leste ba Mundu.

“Ita sei la’o no halo jornada ida bá fatin hotu iha mundu tomak hanesan fatin sira ne’ebé sentru ba indústria petróleu nia sira hodi hala’o promosaun para ema bele mai investe iha ita-nia rai atu ema bele investe iha konkursu públiku ne’ebé ita lansa ona ne’e”, Prezidente ANPM iha Sentru Konvensaun Dili, ohin.

Gualdino dehan ANPM iha fulan neen bá halo atividade promosaun iha Lourdes, Singapura, Austrália, médiu oriente no Xina hodi ema bele hatene liután área potensialidade no rikusoin mina no gás ne’ebé Timor-Leste iha.

“Ita sei la’o tan hodi esplika ba ema riku-soin saida mak ita iha, ambiente investimentu saida mak ita iha, rejime legál saida mak ita iha, rejime kontratuál saida mak ita iha no rejime fiskál saida mak ita iha atubele dada ema hodi investe iha ita-nia rai”, katak.

Timor-Leste halo ona abertura Konferénsia Internasionál Petróleu no Gás ho objetivu atu promove no buka rede inklui loke odamatan ba investidór ba iha atividade petrolífera.

Estadu Timor-Leste liuhosi Primeiru-Ministru Taur Matan Ruak lansa ona konkursu públiku ba mina no gás hamutuk bloku 18.

Mina no gás bloku foun hamutuk 18 ne’e kompostu husi bloku 11 iha tasi no hitu iha rai-maran.

Notísia relevante : Timor-Leste Lansa Konkursu Públiku ba Bloku Foun 18

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here