Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek. Imajen Egas Cristovão

DILI, 2 setembru 2019 (TATOLI) – Komisaun Rekrutamentu ba membru FALINTIL-Forsa Defeza Timor Leste (F-FDTL), aprezenta preparasaun rekrutamentu ba Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato,  Bairru Pité, ohin.

Hafoin aprezentasaun, Vise Xefe Estadu Maiór Jenerál F-FDTL, Brigadeiru Jenerál Falur Rate Laek hateten asuntu rekrutamentu ne’e responsabilidade Xefe Estadu Maiór Jenerál ninia, ne’ebé ohin ko’alia mós ho Prezidente Repúblika kona-ba asuntu ne’e.

Falur informa, oras ne’e, komisaun prepara ona liuhusi halo parseria ho Ministériu Defeza atu oinsá bele halo diseminasaun informasaun ba públiku liliu ba joven sira atu prepara-aan hodi kompete.

Vise Xefe Estadu Maiór Jenerál ne’e mós informa katak rekrutamentu sei hala’o iha janeiru 2020, ne’ebe sei fahe uluk formuláriu no iha selesaun sei hili de’it sira ne’ebé mak prenxe kritéria, sei avansa ba teste médiku hodi prepara ba treinamentu.

Tuir planu, Komisaun Rekrutamentu sei rekruta ema na’in atus neen (600) no Vise Xefe Estadu Maiór Jenerál afirma, sei hili ema ne’ebé di’ak iha mentál, saúde, fíziku, nune’e bele sai forsa ne’ebé profisionál.

“Oras ne’e, ita prepara ona no hein katak iha janeiru 2020 hahú rekrutamentu no sei konklui iha marsu”, Falur tenik.

Jornalista: Cipriano Colo

Editór: Xisto Freitas

2 KOMENTÁRIU

HAKEREK NO HATÁN

Please enter your comment!
Please enter your name here