iklan

HEADLINE, POLÍTIKA

Governu Halo Rezolusaun Konkursu Públiku ba Selebrasaun Kontratu Petrolíferu

Governu Halo Rezolusaun Konkursu Públiku ba Selebrasaun Kontratu Petrolíferu

Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Imajen/Tatoli.

DILI, 2 outubru 2019 (TATOLI) – Ministru Estadu Prezidénsia Konsellu Ministru, Hermenegildo Augusto Cabral Pereira, informa reuniaun ezekutivu, kuarta ne’e, aprova Rezolusaun Governu ida kona-ba rezerva a-favór husi Timor GAP, EP iha konkursu públiku selebrasaun kontratu petrolíferu.

“Aprova rezolusaun para permite rezerva a-favór husi Timor GAP tuir konkursu públiku ne’ebé halo selebrasaun kontratu petrolíferu iha setór minarai nian, nune’e pursentu 20 ba Timor GAP”, tenik governante ne’e iha Palásiu Governu hafoin reuniaun Konsellu-Ministru.

Nune’e, kada kontratu atu fahe produsaun sei selebra iha ámbitu konkursu públiku husi Timor GAP, EP, tuir lejizlasaun ne’ebé vigór no sei negósia kazu pur kazu entre Autoridade Nasionál Petróleu no Minerál (ANPM) no investimentu Timor GAP.

Antes ne’e, iha reuniaun Konsellu Ministru estraordinária loron 27 setembru, aprova Dekretu Governu ne’ebé aprezenta husi Ministru Petróleu no Minerál ein-ezersísiu, Hermenegildo Augusto Cabral Pereira no ANPM, ne’ebé regula prosedimentu kona-ba afetasaun área sira iha territóriu Timor-Leste ba atividade peskiza no produsaun petrolífera nian.

Molok loke konkursu públiku ba selebrasaun kontratu petrolíferu, Timor-Leste sei realiza edisaun dahuluk ba Konferénsia Internasionál kona-ba Petróleu no Gás Timor-Leste (Timor-Leste Oil & Gas Summit 2019), ne’ebé organiza husi ANPM no apoiu husi IN-VR Oil & Gas.

Eventu internasionál ne’e sei realiza iha loron 3 to’o 4 outubru 2019, iha Sentru Konvensaun Díli (CCD-sigla portugés).

Konferénsia ne’e nu’udar eventu ofisiál indústria petróleu no gás dahuluk iha Timor-Leste no sei sura ho partisipasaun hosi oradór nasionál no interanasionál na’in-30, partisipante hosi nasaun 16 kompostu husi ema na’in-250 no empreza hamutuk 250.

Eventu ne’e nia objetivu prinsipál maka reuni profisionál sira iha setór petrolíferu no oferese oportunidade ne’ebé boot ba partisipante sira atu kria, dezenvolve no kontinua parseria komersiál foun no parseria sira ne’ebé eziste ona hosi área hotu.

Jornalista: Julia Chatarina

Editór: Xisto Freitas

iklan
iklan

Leave a Reply

iklan
error: Content is protected !!