Xefe Suku Rairobo, Pedro Leitão. Imajen Tatoli/Cipriano Colo

DILI, 2 outubru 2019 (TATOLI)–Uma-kain (família) atus rua (200) husi aldeia rua iha Suku Rairobo, Atabae, Munisípiu Bobonaro, to’o oras ne’e seidauk asesu eletrisidade.

Situasaun ne’e sai preokupasaun ba Xefe Suku Rairobo, Pedro Leitão, tanba difikulta estudante sira atu estuda iha tempu kalan.

Pedro relata ba TATOLI, ohin, iha Dili, katak iha tinan 2016 Governu instala ona eletrisidade ba aldeia rua mak hanesan Aldeia Limanaru no Faturasi ho nia populasaun atus rua haatnulu (240) resin ida, maibé aldeia rua seluk hanesan Rairobo ho Vila Maria ho nia uma-kain atus rua to’o ohin loron seidauk asesu eletrisidade.

Autoridade lokál ne’e husu Governu liliu ministériu kompetente atu tau-matan ba asuntu ne’e, tanba ninia komunidade iha área rurál presiza duni eletrisidade.

Tanba ne’e, Pedro reprezenta komunidade husi aldeia rua ne’e nia halerik hodi hato’o ba parte kompetente atu tau mós iha konsiderasaun liliu orsamentu Estadu ba tinan 2020.

Aleinde ne’e, nia mós informa katak, tuir loloos, Governu presiza tau-matan espesiál ba Aldeia Rairobo tanba aldeia ne’e instituisaun seguransa sempre uza ba treinamentu liliu ba membru foun Polísia Nasionál Timor-Leste (PNTL).

“Ha’u-nia komunidade presiza ahi, liliu ami-nia oan sira ne’ebé hakarak atu estuda iha tempu kalan susar tebes tanba balun uza de’it lampra oan. Ida-rua mak uza enerjia solár (tenaga surya), maibé maioria hela iha nakukun”, Pedro haktuir.

Kona-ba preokupasaun ne’e, antes ne’e, Prezidente Autoridade Munisipál Bobonaro, Zeferino Soares dos Santos hateten, tuir Ministériu Obra Públika nia planu katak instalasaun eletrisidade ba área Atabae, Suku Koba inklui Suku Saburai sei implementa iha 2020.

“Ne’e Ministru Obra Públika, Salvador Pires rasik mak ko’alia iha Atabae ” Zeferino haktuir.

Tanba ne’e, Zeferino mós hakarak informa ba populasaun iha Postu Administrativu Atabae katak, kona-ba eletrisidade, tinan 2020 sei fó prioridade ba Atabae tomak no suku balun iha munisípiu ne’ebé mak seidauk asesu eletrisidade sei asesu iha 2021.

Entretantu, Suku Rairobo, Postu Administrativu Atabae, Munisípiu Bobonaro kompostu husi aldeia haat ho nia populasaun hamutuk 441.

Jornalista: Cipriano Colo

Editór: Xisto Freitas

1 KOMENTÁRIU

  1. Oinsa eletricidade atu tama. Sei ita Rai nain mak hadau malu projectu. liu2 mak sira nebe intrese .ami nudar Atabae oan suporta krk husi komapnha husi nasional balun atu kaer krk kaer ho kualidade ukun an ne povu nia. Goja mak ahi Be,e mos nmos estrda ida nmk povu nia halerik.laos disijaun husi maun sira leten hatun mai sira iha karaik ne politiza fali oinsa ita kolia kona ba Dezelvmeinto Hanoin susar uituan mak ne dt obrgdo

HAKEREK NO HATÁN

Please enter your comment!
Please enter your name here