Arcebispo ba Arquidiocese Metropolitana Dili, Virgílio do Carmo da Silva, SDB. Imajen/António Gonçalves.

DILI, 01 outubru 2019 (TATOLI) – Ekipa task force ba sítiu relijiozu Na’in-Feto Ramelau deside ona regra foun atu vizitante sira bá vizita presiza kontribui dólar ida.

Ekipa task force ne’e kompostu husi relijiozu ka Dioseze Dili, Ministériu Turizmu, Komérsiu no Indústria (MTKI), Ministériu Agrikultura no Peska, Sekretáriu Estadu Ambiente, Sekretáriu Estadu Komunikasaun Sosiál, no Autoridade Lokál Munisípiu Ainaru.

“Ami-nia enkontru ne’e buka atu haforsa no hadi’a di’ak liután jestaun no haforsa liután seguransa no deside kontribuisaun husi sentavu 25 ba dólar ida (sentavu 100)”, Arsebispu ba Arquidiocese Metropolitana Dili, Virgílio do Carmo da Silva, SDB, hatete hafoin enkontru iha Pasu Episkopál, Lesidere, ohin.

Iha diskusaun ekipa task force ne’e, Bispu Dioseze Dili salienta presiza duni fó kontribuisaun dólar ida ba ema hotu, ki’ik ka boot, estudante ka la estudante, rai-li’ur ka rai-laran bainhira bá vizita Na’in-Feto Ramelau.

Liuhusi sentavu 100 ne’e, Arsebispu dehan pelumenus ajuda Governu atu hadi’a fatin lixu nian no sinál balun ne’ebé aat no bele mós fó netik insentivu uitoan ba ema hirak ne’ebé asegura fatin sagrada Nain-Feto Ramelau ne’e.

Nune’e, Amu Virgílio do Carmo dehan Uma-Kreda ho parte Governu hakarak reforsa jestaun ba sítiu turístiku relijiozu ne’e atu peregrinu ka vizitante sira bá labele estraga ambiente iha fatin ne’e.

“Ita hakarak hadi’ak liután jestaun no mellora Nain-Feto Ramelau liuliu aumenta seguransa atu peregrinu sira bá labele soe fo’er arbiru no respeita regra fatin sagradu ne’e”, katak Bispu.

Bispu Virgílio do Carmo mós husu nafatin sarani katólika sira ne’ebé vizita bá fatin sagradu ne’e atu labele soe lixu no estraga sinál sira ne’ebé monta ona, tanba bá ho objetivu atu reza no agradese Na’in-Feto Maria.

Arsebispu Metropolitana Dili ne’e agradese ba Governu tanba ho vontade di’ak atu mellora no dezenvolve fatin turizmu relijiozu sira iha Timor-Leste.

Hodi relata katak Sekretáriu Estadu Komunikasaun Sosiál kompromete ona atu sosializa liuhosi mídia sosiál atu vizitante ka foin-sa’e sira bá, bele hatene no hakru’uk ba regra sira hodi labele estraga sítiu Na’in-Feto Ramelau.

“Ita halo sosializasaun liuhusi mídia no kada parókia ne’ebé lori prerginu sira bá ne’e presiza mós sosializa atu hatene objetivu ne’e atu reza no adora, la’ós bá sobu no estraga sasán”, Amu Virgílio husu.

Iha fatin hanesan, Diretór Jerál Turizmu, José Filipe Dias Quintas, hatete dólar ida ne’e la’ós ba retribuisaun, maibé hanesan kontribuisaun ida ne’ebé vizitante bá tenke respeitu fatin sagradu ne’e.

“Ohin, ami deside ona kona-ba kontribuisaun ne’e husi sentavu 25 ba sentavu 100 ka dólar ida, para oinsá osan ne’e atu reforsa jestaun karik fatin lixu balun aat bele hadi’a no seluk tan”, esplika.

Nia dehan, Governu kontinua koopera ho parte Igreja atu kontinua mellora jestaun ba sítiu relijiozu Nain-Feto Ramelau atu sai fatin sagradu ho peregrinu sira bá harohan no husu grasa.

Diretór Jerál MTKI ne’e husu nafatin ba joven sira atu vizita Nain-Feto Ramelau labele soe lixu arbiru no estraga ekipamentu sira.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here