Sesaun plenária Parlamentu Nasionál. Imajen/Tatoli

DILI, 1 outubru 2019 (TATOLI) – Parlamentu Nasionál (PN) aprova Projetu Rezolusaun nú.39/V(2a), ho votu a-favór 39, kontra 0 no abstensaun 0, kona-ba rekomendasaun ba Governu atu foti medida protesaun ba ema ho defisiénsia.

Prezidente Parlamentu Nasionál (PPN), Arão Noé de Jesus da Costa Amaral, apresia ho bankada hotu ninia apoia ba rezolusaun ne’e maski PN Timor-Leste rasik seidauk ratifika Konvensaun Organizasaun Nasaun Unida (ONU) kona-ba Direitu Ema ho Difisiénsia.

“Ita seidauk ratifika maibé ita aprova rezolusaun medida protesaun ba ema ho defisiénsia. Ita aprova hodi Governu bele fó prioridade”, dehan PPN liuhosi sesaun plenária, tersa ne’e.

Parte seluk, Deputada Bankada CNRT, Maria Barreto, iha esperansa Governu bele konsidera rekomendasaun sira no bele ratifika konvensaun ONU.

“Rezolusaun ne’e ninia substánsia no rekomendasaun importante liu mak Governu aselera ba ratifikasaun konvensaun ema ho defisiénsia no ita iha ne’e klínika ida de’it iha Laklubar maibé seidauk iha ospitál ida ne’ebé maka espesiál ba sira”, tenik Deputada Maria Barreto, ba Agência TATOLI, hafoin aprova rezolusaun ne’e.

Nia subliña, hafoin aprova rezolusaun ne’e, Komisaun F ne’ebé trata Asuntu Saúde, Seguransa Sosiál no Igualdade Jéneru, nafatin observa Governu kona-ba asuntu ne’e nune’e bele implementa rezolusaun ne’e.

“Tuir istória iha 2015, Parlamentu Nasionál hasai ona rezolusaun ida, entaun rezolusaun ida ne’e reforsa tán iha implementasaun programa no bele benefísia ba ema ho defisiénsia sira”, dehan Prezidente Komisaun F.

Deputadu Bankada PLP, Abel Pires, konsidera rezolusaun ne’e pertenente tebes tanba ne’e nia iha esperansa ba Governu bele implementa rezolusaun ne’e ho di’ak.

Enkuantu, Deputadu Bankada FRETILIN, Fabião de Oliveira, apoia rezolusaun ne’e tanba konsidera Estadu presiza tau-matan ba ema defisiénsia.

“Presiza fó tratamentu ida di’ak ba sira tanba sira mós balun hola parte iha funu ida ne’e, liliu lori karta ba mai iha vila laran iha tempu funu”, hateten Deputadu Bankada Opozisaun ne’e.

Nune’e mós, Deputadu Bankada PD, Mariano Assanami Sabino, fó apoiu tomak ba rezolusaun ne’e.

“Bankada hotu-hotu apoiu rezolusaun ne’e hodi implementa ho di’ak. Ita Timor gosta halo promesa no se bele implementa. Apoia ba rezolusaun ida ne’e maibé governu tenke tau iha programa”, hateten Assanami.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here