Sekretáriu Estadu Kooperativa, Arsénio Pereira da Silva, hasai foto hamutuk ho Grupu Kooperativa sira hafoin asina kontratu. Imajen/Tatoli.

DILI, 30 setembru 2019 ( TATOLI) – Sekretáriu Estadu Kooperativa (SEKoop) apoia orsamentu rihun $49 ba grupu kooperativa 10 ne’ebé halo atividade agríkola.

Orsamentu ne’e liuhosi transférensia públika, ne’ebé mak SEKoop, ohin, selebra ona akordu ho grupu husi munisípiu sira iha Timor-Leste, eseptu Rejiaun Administrativa Espesiál Oekusi-Ambenu.

“Apoiu ne’e fó ba grupu sanulu atu fortifika sira nian atividade kooperativa iha baze, nune’e bele fó benefísiu direta no indireta ba povu atu ajuda partisipasaun iha ekonomia”, dehan SEKoop Arsénio Pereira da Silva hafoin asina akordu ho grupu kooperativa iha Bebora.

Apoiu ne’e hodi fó resposta ba pedidu hosi grupu kooperativa nian, tanba antes ne’e, SEKoop tun ona bá baze hodi vizita grupu sira atu hatene sira-nia nesesidade. Nune’e orsamentu hirak ne’e, grupu kooperativa sira tenke jere ho di’ak.

“Ha’u-nia ekipa halo avaliasaun direta no profundamente ho rigór ba proposta sira ne’ebé ekipa kooperativa propoin mai SEKoop no ha’u rasik haree no ohin bele fó apoiu osamentu ba sira”, hatete Arsénio.

Tanba ne’e, nia husu ba grupu kooperativa atu kumpre kontratu ne’ebé iha, nune’e bá oin sai parseiru di’ak ba SEKoop atu ajuda hodi implementa programa Governu iha baze.

Sekretáriu Estadu Kooperativa, Arsénio Pereira da Silva (loos) kaer liman ho Koordenadora Kooperativa Loron Aban Hahú Ohin, Teresa Maia (karuk), hafoin asina akordu. Imajen/Tatoli.

Iha fatin hanesan, Koordenadora Grupu Juventude “Loron Aban Hahú Ohin”, husi munisípiu Ermera, Teresa Maia, dehan hanesan benefísiariu hosi SEKoop kontente no kompromete hodi ezekuta osan tuir nesesidade ne’ebé iha.

“Ami grupu juventude sira Suku Talimoro, Ermera, kompostu husi na’in-13, daudaun ne’e ami nia grupu hakiak ikan”, afirma Teresa Maia.

Nune’e, orsamentu ne’ebé iha, tuir planu hakarak halo tan tanke ikan ida, tanba antes ne’e iha ona hitu no husik ona ikan hamutuk 8000.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here