Treinadór Lalenok United FC, Yance Matmei. Imajen Mídia LFA

DILI, 28 setembru 2019 (TATOLI) – Treinadór nasionalidade Indonézia, Yance Matmei, susesu lori Lalenok United FC kampiaun Primeira Divizaun Liga Futeból Amadora (LFA) époka 2019.

Susesu treinadór Indonézia ne’e iha kedas bainhira Lalenok sei tuur iha Segunda Divizaun 2017, nia lori ekipa refere promovidu ba Primeira Divizaun iha 2018. Bainhira tuur iha Primeira Divizaun, ekipa refere ba dala uluk halo istória foun iha Timor-Leste, iha ne’ebé LFA hamriik iha 2015 seidauk iha ekipa ida hanesan Lalenok.

Ekipa Lalenok United FC. Imajen Mídia LFA

Tanba ne’e, Yance hateten la fásil ba Lalenok atu kampiaun tanba tuir dalan ne’ebé naruk. Liuhosi difikuldade barak mak foin hetan vitória.

“Ha’u agradese ba Na’i Jesus Kristu. Ho Nia tulun mak ha’u konsege lidera ekipa ne’e kampiaun kedas iha tinan ida ne’e. Maski ekipa ida ne’e foin promovidu ba Primeira Divizaun tinan kotuk no liuhosi difikuldade barak maibé bele hakat liu,” tenik Yance.

Nia hatutan, bainhira klube fó nafatin konfiansa ba nia,  nia sei lori ekipa Lalenok ba futuru ne’ebé di’ak liután.

Hatán ba ne’e, Prezidente Klube Lalenok, Pedro Belo deklara sei mantein nafatin treinadór ne’e tanba iha duni vontade lori ninia klube ba oin.

“Ami sei mantein treinadór ne’e. Nia lori Lalenok hosi Segunda Divizaun to’o ohin loron sai kedas kampiaun. Ne’e la’ós halimar. Tan ne’e, ami mantein nafatin nia,” dehan Pedro Belo.

Vitória Lalenok atinjidu sábadu loraik ne’e iha Estádiu Munisipál Dili hafoin halakon armada Académica FC ho rezultadu golu 3-2.

Maski sei hela ekipa rua hanesan Karketu Dili FC no Boavista FC Timor mak taka jogu LFA époka 2019 maibé somente kompleta de’it jogu tanba pontu Lalenok aas liu ekipa rua ne’e.

Golu Lalenok prodúz hosi jogadór Fábio Christian Cotinho iha minutu 48, Elias Mesquita 51, Italo Pimentel 81. Enkuantu, golu Académica nian hatama hosi jogadór Felix Gama iha minutu 62 no Bayu Guntoro 71.

Entretantu, fó hanoin fali, ekipa rua hanesan Académica no Ultramar obrigadu dezpromovidu ona ba Segunda Divizaun no ekipa rua seluk hanesan Aitana FC no DIT FC mak sei substitui fali ekipa rua ne’e nia fatin.

Enkuantu, ekipa sira seluk hanesan Assalam FC, AS Ponta Leste, Karketu Dili FC, Boavista FC Timor no AD SLB kontinua mantein iha Primeira Divizaun basá pontu ba ekipa hirak ne’e aas liu ekipa rua ne’ebé dezpromovidu.

Hori LFA eziste, ekipa ne’ebé loke odamatan kampiaun ninian mak SLB iha époka 2016 liubá. Iha 2017, Karketu Dili FC mak Kampiaun. Époka 2018, Boavista FC Timor no époka ida ne’e (2019), Lalenok United FC.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here