Provedora Direitu Umanu no Justisa, Jesuína Maria Ferreira Gomes. Imajen Tatoli/Egas Cristovão

DILI, 27 setembru 2019 (TATOLI) – Tinan ne’e Timor-Leste (TL) sei sai uma-na’in ba enkontru tékniku no konferénsia annuál fórum instituisaun nasionál direitu umanu Sudeste Aziátiku, ne’ebé sei organiza husi Provedoria Direitu Umanu no Justisa (PDHJ-sigla portugés) iha loron 22 to’o 24 outubru.

Fórum internasionál ne’e sei partisipa husi nasaun Indonézia, Malázia, Myanmar, Filipina, Tailándia.

Provedora Direitu Umanu no Justisa, Jesuína Maria Ferreira Gomes, informa konferénsia annuál ne’e sei hahú ho semináriu internasionál ho tema “Inkluzividade no igualdade ba ema ho defisiénsia”, tanba ne’e sei konvida parte relevante sira inklui Primeiru-Ministru, Taur Matan Ruak hodi sai oradór.

“Ami mai hakarak konvida Primeiru-Ministru atu bele partisipa iha semináriu internasionál atu partilla esforsu saida mak Governu halo ona liga ho ratifikasaun konvensaun internasionál direitu ba ema ho defisiénsia nian. Ohin, Primeiru-Ministru dehan sei haree ninia tempu. Bainhira la partisipa mós sei delega membru Governu ida atu partisipa iha semináriu internasionál”, tenik Jesuína Maria iha Palásiu Governu, sesta ne’e.

Nia hatutan: “Iha semináriu, husi nasaun lima sei partilla sira-nia implementasaun kona-ba konvensaun internasionál ema ho difisiénsia. Nune’e mós sosiedade sivíl sira sei partisipa, inklui aprezentasaun husi reprezentante ema ho difisiénsia”.

Nia subliña, maski Governu tuir ona Konvensaun Organizasaun Nasaun Unida (ONU) kona-ba Direitu Ema ho Difisiénsia, maibé to’o agora Parlamentu Nasionál seidauk ratifika.

“Atu ratifika konvensaun ida presiza preparasaun, polítika no kondisaun. Tanba ne’e mak to’o agora seidauk ratifika. Espera iha tempu badak bele ratifika ona konvensaun direitu ema ho difisiénsia”, nia akresenta.

Tuir nia, agora daudaun, Governu sei halo esforsu. Ne’e duni, PDHJ hakarak konvida Governu no Parlamentu atu partilla programa ne’ebé sira halo hela atu ratifika konvensaun.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here