Prezidente Rede Feto Timor-Leste, Judite Dias Ximenes ho nia estrutura relata ba mídia kona-ba rezultadu audiénsia ho Prezidente Repúblika, Francisco Guterres Lú Olo, kona-ba Kongresu Rede Feto Timor-Leste ba dalimak. Imajen Tatoli/Cipriano Colo

DILI, 26 setembru 2019 (TATOLI) – Rede Feto Timor-Leste konvida Prezidente Repúblika, Francisco Guterres Lú Olo, atu halo abertura (loke) Kongresu Feto Timor-Leste ba dalimak ne’ebe tuir planu sei realiza iha 23-26 outubru 2019.

Hafoin audiénsia, Prezidente Rede Feto, Judite Dias Ximenes hateten Komisaun Organizadora ba Kongresu Dalimak Feto Timor-Leste ne’e konvida Xefe Estadu atu halo abertura ba eventu ne’ebé sei halibur partisipante feto hamutuk ema na’in-400 husi munisípiu 12 no Rejiaun Administrativa Espesiál Oé-Cusse Ambeno (RAEOA).

Nia informa katak objetivu husi kongresu ne’e atu defini plataforma asaun ne’ebé sei sai dokumentu polítiku feto Timor-Leste nian.

Kona-ba konvite ne’e, Judite haktuir, Prezidente Repúblika agradese no sei hato’o mensajen iha Kongresu Feto Timor-Leste ba dalimak.

Nia hatutan katak Prezidente Repúblika enkoraja Rede Feto atu serbisu hamutuk ho organizasaun feto iha partidu polítiku.

Judite fó sai mós Prezidente Repúblika ninia kompromisu atu tau atensaun no mantein diálogu ho sosiedade tomak, diálogu ho sosiedade tomak, instituisaun públiku no privada, relijiozu no tradisionál atu bele mobiliza luta ba igualdade feto ho mane.

Prezidente Rede Feto ne’e relata katak durante kongresu ne’e sei hasai Plata Forma Asaun ba tinan 4.

Aleinde ne’e, nia dehan, iha temátiku importante hitu ne’ebé sei ko’alia mak hanesan kultura patriarkál, justisa tradisionál, edukasaun, saúde, tráfiku umanu, ekonomia no traballadora feto, polítika desentralizasaun no mós inkluzaun sosiál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here