Diretór Jerál Turizmu, José Filipe Dias Quintas. Imajen/Tatoli.

DILI, 26 setembru 2019 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, informa lixu ne’ebé namkari iha fatin públiku bele afeta ba imajen Timor-Leste, tanba nasaun ne’ebé furak tenke soe lixu iha nia fatin.

“Lixu ne’e bele afeta imajen Timor-Leste nian, maski ita nasaun furak maibé lixu namkari iha fatin hotu ema bele hakribit”, José Quintas ba Ajénsia Tatoli, ohin, iha ámbitu serimónia espozisaun ne’ebé realiza iha Sentru Konvensaun Dili (CCD, sigla portugés) hodi komemora Loron Mundiál Turizmu ne’ebé sei realiza iha 27 setembru.

Iha ámbitu Loron Mundiál Turizmu, Governu ho parseiru dezenvolvimentu sira sei serbisu hamutuk hodi halo kampaña sensibilizasaun ba jestaun lixu iha área tasi-ibun ka área turístika hodi informa ba vizitante sira, iha kada domingu to’o dezembru.

“Ministériu Turizmu serbisu hamutuk ho PNTL no Movimentu Tasi Moos no Munisípiu Dili, ami sei halo kampaña sensibilizasaun kona-ba jestaun lixu kada domingu to’o dezembru”, afirma.

José Quintas husu ba ema hotu atu labele soe lixu arbiru, maibé tenke tau iha nia fatin tanba jestaun ba fo’er la’ós de’it Governu nia problema, más ema hotu nia, tanba jestaun la loos maka lixu namkari, nune’e ko’alia kona-ba jestaun, ema hotu tenke kontribui katak lixu tenke tau iha fatin.

“Labele soe lixu iha fatin públiku sira, jestaun ida simples maka tenke soe lixu iha nia fatin”, dehan.

Tanba ne’e, iha Loron Mundiál Turizmu, Governu ho nia programa sira maka hanesan, ohin (26/09), hahú realiza espozisaun durante loron lima nia laran. 27 setembru sei iha programa kona-ba limpeza jerál iha área turístika sira, nune’e mós iha programa ida tan iha Timor Plaza kona-ba diskusaun hosi interesadu sira atu komesa prepara Planu Estratéjiku Nasionál Turizmu 2030 nian, aliña ho polítika ne’ebé Governu aprova ona iha 2017, enkuantu programa sensibilizasaun jestaun lixu sei akontese iha kada domingu to’o dezembru.

Nune’e maka Governu aloka orsamentu rihun $11 atu bele apoia programa hirak ne’e iha ámbitu Loron Mundiál Turizmu no sei remata ho sensibilizasaun jestaun lixu iha dezembru 2019.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here