Diretór Nasionál Kuarentena, Venâncio Oliveira. Imajen/Jogerjo Guterres.

DILI, 26 setembru 2019 (TATOLI) – Diresaun Nasionál Kuarentena no Bioseguransa Ministériu Agrikultura no Peska (MAP), hein hela pedidu husi Autoridade Nasionál Petróleu no Minerál (ANPM) hodi asegura kompañia China Harbour lori fatuk bá halo teste iha laboratóriu.

Kuarta ne’e, empreza China Harbour atu lori fatuk ho kilograma 65 liuhosi Aeroportu Nicolau Lobato, atu hala’o teste laboratóriu, maibé ANPM seidauk fó koñesimentu ba Diresaun Nasionál Kuarentena.

“Ami hein pedidu husi ANPM atu prosesa lisensiamentu ba kompañia China Harbour atu lori bá hala’o teste iha rai-li’ur,” Diretór Nasionál Kuarentena no Bioseguransa, Venâncio Oliveira, ba Tatoli iha Komoro, ohin.

Diretór ne’e friza kompañia presiza prienxe rekizitu hodi Kuarentena tau adezivu (stiker) no segel, hafoin lori bá hodi asegura fatuk ne’e labele hetan apreensaun (foti).

“Ami husu ba sira (China Harbour) atu sira informa fali ba ANPM haruka karta mai fali ami atu ami bele prosesa tuir baze legál hodi lori lalais fatuk ne’e bá hala’o teste ba interese nasionál”, katak.

Daudaun, Diretór Venâncio dehan seidauk iha informasaun ba volume fatuk ne’e no atu lori bá teste iha nasaun ne’ebé tanba seidauk iha pedidu.

ANPM halo ona karta ba Alfándega lori prosesu espedisaun hodi lori bá rai-li’ur, maibé parte Kuarentena mós presiza dokumentu husi ANPM para haree fatuk ne’e merese duni atu lori sai bá hodi teste.

“Ami prontu para prosesa lisensa autorizasaun ne’e liuhusi sira (kompañia) mai prienxe aplikasaun no ami prosesa mínimu la to’o loron tolu bele foti ona no lori ona bá rai-li’ur atu hala’o teste”, katak.

Bazeia ba dekretu lei 21/ 2003 no dekretu Governu númeru 1/2006 ninian ne’e, sasán saida de’it mak atu esporta no importa Kuarentena fó lisensiamentu no tau adezivu no segel atu asegura.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here