BAUCAU, 26 setembru 2019 (TATOLI)—Diretór Formasaun Kualifikasaun Profisionál husi Institutu Nasionál Administrasaun Públika  (INAP), José Araújo Chang, hateten INAP hala’o hela treinamentu kona-ba planeamentu munisipál  ba diretór jerál  munisípiu no administradór sira husi Postu Administrativu neen (6) iha Munisípiu Baucau hodi responde ba Governu Sentrál ne’ebé hahú delega ona poder ba iha munisipál liuhusi polítika desentralizasaun.

“Treinamentu ne’e ho objetivu atu eleva Administardór  sira-nia koñesimentu abilidade ba iha área planeamentu. Tanba, ita hatene katak poder balun ne’e delega ona mai iha munisípiu. Entaun, bainhira polítika ne’e hala’o loos ona, espera katak iha 2020 ne’e buat hotu bele kompletu ona no administradór sira no elementu sira ne’e prontu para simu knaar hirak ne’e,” dehan dehan Diretór Formasaun Kualifikasaun Profisionál (INAP), José Araujo Chang, ba Ajénsia TATOLI liuhusi entrevista bainhira fó hela treinamentu ba partisipante sira iha aula treinamentu iha edifísiu Administrasaun Munisipál Baucau, kinta (26/09/2019).

Treinamentu ne’e hala’o, nia hatutan, tanba Governu Sentrál delega ona poder desentralizaun administrativa no planu ba desentralizasaun territoriál, liuliu delegasaun poder ba adminsitradór sira iha kbiit para hodi hala’o programa ne’ebé mak iha munisípiu ne’e rasik.

“Tanba administradór sira mak hanesan autór prinsipál ne’ebé mak sira  hala’o no sira mak besik liu postu no poténsia iha postu liuliu poténsia iha área sira mak hatene no domina liu. Sira mak tenke iha koñesimentu no atu halo oinsá sira mak hatene liu,” hateten José Araújo Chang.

Ezemplu, nia haktuir,  atu halibur dadus entaun sira tenke hatene demografia populasaun. Sira tenke hatene ema hira mak asesu no seidauk asesu ba bee-moos, ema hira mak asesu ona no seidauk asesu ba sentru saúde. Iha treinamentu ne’e ita ko’alia liu programa maibé pontu importante liu mak dadus.

Entretantu, nia esplika, materia treinamentu ne’ebé fó ba diretór jerál no adminsitradór  sira mak  jestaun estratéjika no mós planeamentu programa munisipál, komunikasaun efetiva no komunikasun koordenasaun, tanba administradór postu sira ne’e tenke iha abilidade ba iha komunikasaun, koordenasaun ho PNTL nomós ho setór sira seluk ne’ebé mak iha munisípiu/

Alende hala’o treinamentu iha Munisípiu Baucau, nia informa, treinamentu hanesan hala’o ona ba lider komunitária sira iha Munisípiu haat mak hanesan Munisípiu Covalima, Manufahi,  Manatutu no Baucau. Iha fulan Outubru nia laran, INAP sei fó treinamentu ba munisípiu sira ne’ebé mak seidauk kobre ba programa ne’e.

Programa ne’e, tuir nia, sei fó hotu ba munisípiu 12  la inklui RAEOA tanba situasaun RAEOA ne’e hanesan autonomu espesiál.

Partisipante sira ne’ebé tuir treinamentu ne’e mak diretór jeral munisipiu no Adminostardor Postu Administrativu neen hanesan Baucau Vila, Venilale, Vemasse, Baguia no Quelicai ne’ebé pertense ba Munisípiu Baucau hamutuk ema na’in 25 inklui mós funsionáriu sira ne’ebé aloka iha Postu no mós Munisipiu nian.

Jornalista: Felicidade Ximenes

Editór.       : Rafy Belo

HAKEREK NO HATÁN

Please enter your comment!
Please enter your name here