Sekretáriu Estadu Formasaun Profisionál no Empregu, Julião da Silva. Imajen/Mídia SEFOPE.

DILI, 26 setembru 2019 (TARTOLI)- Sekretáriu Estadu Formasaun Profisionál no Empregu (SEFOPE), Julião da Silva, hateten funsionáriu SEFOPE nian ne’ebé fó teste ba kandidatu traballadór sira bá serbisu iha Austrália no Korea tenke domina lian inglés.

Tanba tuir Julião da Silva, kandidatu balu domina lian ingles liu fali funsionáriu, nune’e hamosu dezentendimentu entre parte rua.

“Ha’u bá akompaña funsionáriu sira fó teste ba kandidatu sira dala ruma la komprende, ne’ebé ha’u preokupa tebes tanba ne’e funsionáriu sira tenke aprende inglés, se lae ba fó teste kandidatu sira hatene inglás liu fali ita sira teste ne’e susar ona”, dehan Julião da Silva iha Bekora, ohin.

Governante ne’e hatutan, dala barak nia rona empregadór no to’os-na’in sira hosi Austrália hirus kona-ba billete tanba sosa tiha depois kansela, ne’e tanba funsionáriu la kompriende inglés hodi prienxe formuláriu.

“Iha esperiénsia tinan kotuk bainhira ha’u hala’o vizita iha Austrália imi (funsionáriu) telefone ba ha’u katak iha ema na’in-18 labele la’o tanba falla iha billete. Situasaun sira ne’e akontese iha buat rua, ida, imi maka sala, rua, labele fó sala ba ema tanba imi la komprende inglés, nune’e formuláriu sira haruka mai bele prienxe sala”, Julião relata.

Tanba ne’e SEFOPE koordena ona ho Governu Austrália liuhosi Workforce Development Program Timor-Leste (WDPTL) hodi fó kursu ba funsionáriu sira.

Nia mós preokupa ho maneira atendimentu funsionáriu sira, tanba la hatudu oin-midar. “Ha’u ko’alia beibeik, no atu ko’alia tan mós ha’u moe fali tanba buat ida ne’e imi la halo, buat ida fó atendimentu ba ema ho oin-midar (hamnasa) ne’e importante tebes, se iha problema família rai hela iha uma”, Julião husu.

Kona-ba kursu lian inglés ba funsionáriu, Embaixadór Austrália iha Timor-Leste, Peter Robert, dehan Austrália prontu hodi fó kursu no sei realiza iha 30 setembru 2019.

“Ha’u rekoñese katak funsionáriu SEFOPE nian durante ne’e servisu maka’as hodi haruka traballadór sira ho kualidade bá servisu iha Austrália. Husi rekrutamentu iha munisípiu, fó teste, treinamentu, prepara no mós re integrasaun filafali bainhira sira fila mai Timór”, katak.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here