Prezidente Autoridade Munisipiu Baucau, António Guterres. Foto TATOLI: Cancio Ximenes

BAUCAU, 25 setembru 2019 (TATOLI)—Prezidente Autoridade Munisipiu Baucau, António Guterres, informa populasaun sira iha Munisípiu Baucau ne’ebé hela namkari iha Postu Administrativu neen maioria asesu ona bee-moos.

Nia hateten, informasaun ne’e nia relata ba publiku tanba bazeia dadus espesifiku ne’ebé halibur husi ekipa Agua no Saneamentu Munisipál iha Postu Administrativu Baucau Vila, Vemase, Venilale, Laga, Quelicai no Baguia.

“Espesifikamente, ha’u atu klarifika katak iha Postu Administrativu Baguia iha suku 10 no aldeia hamutuk 47. Husi aldeia 47 ne’e, la asesu ba bee-moos ne’e iha aldeia 14 no aldeia 33 mk asesu  bee-mos. Aldeia sira ne’ebé la asesu bee-moos ne’e mak Aldeia Larigua, Larisula, Afalari, Watata, Bibida’e, Baida’e, Baiana, Bubua, Lauari, Tirifalu, Watatefu, Uuru, Daraloi Kraik, Daraloi Leten no Wakala,” dehan Antonio Guterres ba Ajensia TATOLI liuhusi entrevista iha nia knaar fatin, Baucau Vila Nova, loron hirak liu ba.

Jeralmente, nia hatutan, iha parte Postu Administrativu Baucau Vila, populasaun sira hotu asesu ona bee-moos. Maski iha Baucau Vila ema hotu kritika katak área RSS (Rumah Sangat Sederhana) ne’e seidauk asesu bee-moos maibé RSS ne’e hanesan bairru ida ne’ebé halibur ema sira husi multi aldeia.

“Ami sei planeia hela maibé área urbana la kontempla ho dekretu lei ne’ebé fó kompeténsia ba ami. Ami nafatin serbisu ho diresaun bee-moos maibé ami koopera hela ba planu ida oinsá mak área urbana ne’e asesu ba bee-moos no estende área urbana ne’e to’o iha Postu Administrativu tuir polítika Oitavu Governu nian,” nia dehan.

Bainhira sira ba halo diskusaun orsamentu tékniku infraestutura nian, prezidente autoridade ne’e hatutan, Diretór Nasionál Bee no Saneamentu hateten realidade Banku Mundial halo peskiza iha área urbana no postu sira ne’e mak bee seidauk iha, entaun autoridade munisipiu sei prepara sasán para bee mai karik sira bele uza.

“Husi 65 aldeia ne’ebé pertense ba suku 11 iha Baucau Vila, área RSS mak seidauk hetan bee-moos maibé fatin seluk ne’e asesu ona bee-moos. Kondisaun ne’ebé iha, ita tenke hadi’a maibé ita seidauk ko’alia kona-ba hadi’a. Ita sei ko’alia kona-ba instalasaun ne’ebé  bee iha ona ninia devit ne’e menus ka mais. Ita seidauk ko’alia kona-ba ida ne’eba,” nia informa.

Nia haktuir, iha Postu Administrativu Laga iha aldeia 57 maibé aldeia 19 mak seidauk bele asesu bee-moos. Entretantu, iha Postu Administrativu Quelicai iha aldeia 55 no aldeia 19 mak asesu bee-moos maibé aldeia 39 seidauk asesu bee-moos.

Iha Postu Administrativu Vemasse, nia relata, husi aldeia 22 ne’e aldeia 21 mak asesu ona ba bee-moos no aldeia ida de’it mak seidauk bele asesu ba bee-moos mak Aldeia waiarabo’o. Maibé iha Aldeia Waikainasa no Wainiwai mós presiza hadi’a kondisaun ida ne’e katak laiha liu aldeia ida mak la asesu maibé ida uituan-uituan iha ona ne’e prezisa uza no ta’u matan didi’ak.

“Ami fó hanoin ba malu katak Diresaun Servisu Agua no Saneamemntu Munisipál tenke estabelese Grupu Maneja Fasilidade (GMJ) ne’e tenke iha para labele ki’ik-boot kanu kotu mós hakilar Governu. Ida ne’e mak ha’u-nia hanoin entaun ha’u tenke iha dadus mak habelar para hatudu faktus,” nia hateten.

Iha Postu Administartivu Venilale, nia haktuir, iha aldeia 35 ne’e hotu-hotu asesu bee-moos. Maibé, tuir nia, presiza mós hadi’a fatin sira hanesan iha Akauata, Lulibau no Liabala para populasaun sira bele asesu bee-moos.

“Iha Baucau aldeia hamutuk 288 ne’e, aldeia 211 mak asesu ona bee-moos no aldeia 71 seidauk asesu ba bee-moos. Ha’u la bele dehan 80% ne’e demais ona. Dadus ne’e la’os ko’alia arbiru. Ne’e asinadu husi Administradór Postu Administradór sira no ha’u hein aprova de’it dadus kompletu,” Prezidente Autoridade Munisípiu Baucau ne’e esplika.

Tuir planu, dadus hirak ne’e nia parte sei fó ba postu administrativu sira atu taka sai iha postu sira ne’e para ema hotu hatene katak dadus ne’e loos tuir lia-loos no la’ós dadus inventadu ka dadus imajináriu.

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here