Prezidente Autoridade Munisipiu Baucau, António Guterres. Imajen/Cancio Ximenes

BAUCAU, 25 setembru 2019 (TATOLI)—Prezidente Autoridade Munisipiu Baucau, António Guterres, hateten enkontru ho UN Woman bazeia ba akordu entre Autoridade Munispiu Baucau  ho UN Woman em termos de administrativu bazeia ba artigu 81º dekretu lei Nú. 3/2016 (altera ba 2018) hateten Prezidente Autoridade Munisipál sira iha autonomia administrativu

Nia dehan, kestaun ida ne’e ita halo akordu tanba bazeia ba peskiza ne’ebé TOMAK (Toos ba Moris Di’ak) halo iha tinan kotuk ba merkadu Venilale, Baucau Vila, Laga, Vemase, sira hamosu isu ida ne’ebé pertenente liu atu halo ho Autoridade Munisipál Baucau em termos kondisaun bee, saneamentu no seguransa.

Husi akordu ne’e, Autoridade Munisípiu Baucau no UN Woman asina nota intendimentu ida hodi kria programa “Sidade Seguru no Merkadu Seguru” iha Munisípiu Baucau.

“Ita asina nota entendimentu ho UN Woman ne’e liga ba progarama ‘Sidade Seguru no Merkadu Seguru’. Sidade Seguru no Merkadu Seguru ne’e, ha’u bele hatete seidauk akontese iha fatin seluk. Foin akontese iha Baucau. Depois Forum Vendedór mós foin loke iha Baucau,” dehan Prezidente Autoridade Munisípiu Baucau, António Guterres, ba Ajénsia TATOLI liuhusi entrevista iha nia kaar fatin, Baucau Vila Nova, kuarta (25/9/2019).

Nia hatutan, akordu ne’ebé nia halo ho UN Woman kona-ba Sidade Seguru no Merkadu Seguru, autoridade labele la’o mesak maibé tenke tenke la’o ho Baucau oan sira. Ko’alia kona-ba merkadu seguru, vendedór sira ne’ebé moris iha merkadu mak sente tenke seguru.

Oinsá mak seguransa ba sira ne’e, nia hatán, la presiza polísia no grupu sivíl sira loron-kalan iha de’it merkadu ne’ebá hanesan seguransa maibé husu ba vendedór sira ne’ebé uza merkadu hanesan kampu traballu ida ba sira atu moris seguru.

“Seguru ba ema hotu para ema livre ba mai. Tanba ne’e sentru ida komersializasaun liga ba Viqueque, liga ba Lautem, liga ba Manatuto no fronteira hale´u tiha ita. Ba fali ho Norte nian, ita mós baliza ho parte Wetar. Ba futuru, ita tenke hahú agora. Ne’ebé, Sidade Baucau ne’ebé nia oin agora sabraut ne’e loron ruma sai “Sidade Seguru”.

Sidade Seguru, nia dehan, oinsá mak Autoridade Munisípiu Baucau hanoin atu envolve entidade hotu-hotu.  Sidade Seguru la’ós afeta ba pesoál maibé tenke Baucau oan sira sente katak Sidade Baucau ne’e tenke seguru.

Entretantu, nia esplika, Merkadu Seguru sei ko’alia kona-ba asidu seksual katak Baucau situasaun infraestrutua sei menus maibé riku ba ema ne’ebé bazeia ba fixa familiár ne’ebé halibur iha 2018 mai husi suku ida-idak hamtuk 134.547 habitantes.

“Agora ema barak mak mai buka moris iha merkadu enatun ita mós asina nota intendimentu ho UN Woman para fasilita no sensibiliza matéria ida ko’alia kona-ba asediu seksuál. Bainhira joven sira la´o iha dalan karik, hase malu hanesan naan ho feton maibé labele hanoin buat negativu ruma iha ninia kakutak,” nia esplika.

Tanbasá mak tenke kria “Sidade Seguru no Merkadu Seguru”, nia hatán, atu halakon kódigu ida ne’ebé ema tau ba Munisípiu Baucau “Muturabu” ne’e mak inspira nia atu kria programa ida ne’e.

“Ha’u sente katak kódigu ida ne’ebé ema tau ‘Muturabu’ ne’e mak inspira ha’u. Seraké ha’u bele kontente ho liafuan ida Baucau muturabu. Ami Baucau ne’e krítiku no analítiku. La signifika katak ‘Muturabu’ beibeik ho fíziku. Se ha’u hakmatek de’it iha ha’u-nia fatin hein Governu Sentrál, di’ak liu book-aan ho administrativamente la’o ho ajénsia internasionál ne’ebé ninia interese mai hadi’a rai no povu Baucau ida ne’e,” nia dehan.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here