Prezidente Autoridades Nasional Comunicação ( ANC) João Olivio Freitas. Imajen/Tatoli.

DILI, 25 setembru 2019 (TATOLI) – Prezidente Autoridade Nasionál Komunikasaun (ANC- sigla portugés), João Olívio Freitas, hateten dadaun ne’e ANC forma ona ekipa ida atu halo verifikasaun ba dokumentu Empreza Telekomunikasaun Ceslink, antes atribui lisensa ba kompañia refere hodi halo lansamentu atu sai operadór telekomunikasaun iha Timor-Leste.

Prosesu inísiu ne’ebé ANC halo maka komunika ba empreza Ceslink atu submete dokumentu kustu administrativu ne’ebé nesesáriu, iha ne’ebé  define ona iha anexu 1 Dekretu Lei Númeiru 15/2012, nune’e ANC bele haree no halo uluk avaliasaun ba dokumentu administrativu.

“Ita mós fó tempu ne’ebé adekuadu ba Ceslink ho fulan rua atu sira prepara dokumentu ne’ebé detallu”, Prezidente Autoridade Komunikasaun, João Olívio Freitas ba Ajénsia Tatoli iha nia serbisu fatin, Kaikoli, ohin.

Nune’e mós empreza Ceslink tenke kumpre rekizitu ida maka garantia (jaminan) osan ne’ebé tau hosi operadór iha banku, depois banku sei hasai karta ida fó mai ANC katak osan ne’e tau hosi operadór  telekomunikasaun Ceslink ho montante hanesan ne’e. Kritériu seluk fali maka edifísiu empreza Ceslink tenke iha Timor-Leste.

Kuandu Ceslink kumpre ona rekizitu maka ANC emite frekuénsia no númeru telemovel ba sira hodi hahú lansa ona sira nian operadór iha Timor-Leste, maibé empreza seidauk prienxe rekizitu entaun ANC seidauk bele autoriza atu uza rádiu frekuénsia no númeru telemovel.

Jornalista : Natalino Costa.              

Editora    : Maria Auxiliadora

HAKEREK NO HATÁN

Please enter your comment!
Please enter your name here