Ministru Defeza no Ministru Interiór Interinu, Filomeno da Paixão de Jesus. Imajen Tatoli/Cipriano Colo

DILI, 24 setembru 2019 (TATOLI) – Ministru Defeza Seguransa no Ministru Interiór Interinu, Filomeno da Paixão de Jesus, hala’o enkontru mensál ho Prezidente Repúblika (PR), Francisco Guterres Lú Olo, ohin, iha Palásiu Prezidente Nicolau Lobato, Bairru Pité.

Durante enkontru, Paixão informa, kona-ba Timor-Leste ninia akizisaun ba meiu atu asegura Kosta Súl liliu atu halo patrullamentu konjunta ho Austrália.

Kona-ba patrullamentu konjunta ne’e oras ne’e dadaun nasaun rua iha hela faze diskusaun atu buka hodi hakle’an kona-ba mekanizmu ne’ebé di’ak liu.

Aleinde ne’e, ajenda prinsipál ne’ebé aprezenta mós ba Prezidente Repúblika mak dezenvolvimentu iha defeza parte instituisaun FALINTIL-Forsa Defeza Timor-Leste (F-FDTL) no Ministériu Interiór nian liliu instituisaun Polísia Nasionál Timor-Leste (PNTL).

Maibé, iha pontu atensaun durante enkontru mak enfaze liubá Autoridade Marítima, reforma iha Polísia, Konseitu Estratéjiku Militár foun no dezenvolvimentu instituisaun rua en-jerál.

Paixão subliña liután, kona-ba seguransa área marítima Timor-Leste (TL) nian, haree liubá zona eskluziva iha parte súl nian, oinsá dezenvolve kooperasaun ho Austrália iha fururu.

Kona-ba reforma iha Polísia, liga ho oinsá book uluk iha ninia orgánika ne’ebé ko’alia kona-ba sistema forsa Polísia nian, atu forma unidade saida de’it, haree liubá kolokasaun Polísia iha distritu, Forsa Unidade Marítima inklui Forsa Unidade Espesiál.

Orgánika ne’e rasik balun bele muda no balun bele mantein. Iha estatutu, ko’alia kona-ba Polísia ne’e ninia karreira hosi báziku, to’o iha komisáriu ho nia kritéria sira, liga mós ho terseira diploma mak Regulamentu Disiplina Polísia (RDP), ne’ebé oras ne’e prontu ona.

Hosi aspetu tolu ne’e, kompostu hosi estatutu, orgánika no RDP ne’e, sei iha tan diskusaun ikus nian dala ida tan, no outubru Ministru Defeza no Interiór Interinu sei aprezenta ba Konsellu Ministru (KM).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here