Mapa Baucau

BAUCAU, 24 setembru 2019 (TATOLI)—Diretór Edukasaun Munisípiu Baucau, Januario Natalino José Amaral, hateten kualidade edukasaun iha Munisípiu Baucau indika liuhusi rezultadu valór ezame nasionál no tuir kompetisaun ruma, Munisípiu  Baucau sempre tama iha mellor kualifikasaun.

“Tuir ha’u haree, iha ezame nasionál no kompetisaun, Munisípiu Baucau sempre tama iha kualifikasaun ne’ebé di’ak. Estudante sira ne’ebé tuir ona kompetisaun, sira sempre tama iha kategoria di’ak. Ezemplu tinan rua ba kotuk, olimpiade Matemátika ho siénsia ba Portugal, estudante ida husi Eskola Sekundária St. António Baucau Filial Fatumaka mak ba Portugal,” dehan Diretór Edukasaun Munisípiu Baucau, Januario Natalino José Amaral, ba Ajénsia TATOLI liuhusi entrevista iha nia knaar fatin, Baucau Vila Nova, tersa (24/9/2019).

Kona-ba kompetisaun olimpiade Matemátika, nia haktuir, agora daudaun sira sei tuir tan siénsia Matemátika iha Dezembru oin mai, estudante Baucau oan na’in rua sei tuir Kompetisaun Siénsia Matemátika iha Qatar.

“Ha’u hakarak informa, estudante na’in rua ne’ebé atu tuir kompetisaun Matemátika iha Qatar mak estudante ida husi Eskola Venilale no husi Eskola São Domingos Sávio Baucau. Sira na’in rua mak ba tanba na’in rua tama iha kualifikasaun 10 mellores. Tanba ne’e, ministériu edukasaun halo daudaun preparasun ba estudante refere atu ba Qatar iha Dezembru oin mai,” nia informa.

Aleinde ne’e, nia hatutan, kualidade edukasaun la’ós de’it sukat husi estudante sira-nia prestasaun maibé sukat mós husi garante kualidade husi profesór/a sira. Kada tinan profesór/a sira ne’ebé tuir konkursu ba profesór/a sira, tuir nia, Munisípiu Baucau sempre tama iha mellor kualifikasaun.

“Hanesan tinan haat ka tinan lima ba kotuk ne’e, konkursu husi profesór/a ninian kona-ba hakerek  ne’e, profesora husi Gariwai Fatumaka mak sai primeiru mellor. Iha tinan tolu ba kotuk, selesaun  mellor ba profesór sira, profesór ida husi Baguia mak sai mellor profesór, ne’ebé reprezenta Timor-Leste hodi haruka ba Tailándia hamutuk nasaun 11 seluk ne’ebé hetan prémiu husi prinseja Tailándia,” diretór ne’e haklaken.

Nia hateten, profesór/a sira iha Timór laran ne’e mesak ema ne’ebé iha kualidade maibé liuliu profesór/a sira iha Munsípiu Baucau iha kualidade di’ak tanba ninia indikadór mak kada tinan halo ezame nasionál, estudante barak husi Munisípiu Baucau mak hetan valór ne’ebé tama iha kualifikasaun 10 mellor.

Nia relata, iha Munisípiu Baucau, Eskola Pre-Eskolár hamutuk 19, Eskola Ensinu Báziku Sentrál ne’e hamutuk 25, Eskola Bázika Filiák ne’e hamutuk 178, Eskola Sekundáriu  Jerál ne’e iha 12 no mós iha Eskola Téknika Vokasionál ne’e hamutuk iha neen (6) ne’ebé kompostu husi eskola sentrál no eskola filiál sira ka klase paralela.

Diretór Edukasaun Munisípiu Baucau ne’e informa, Eskola Ensinu Superiór akreditadu ne’ebé eziste iha  Munisípiu Baucau mak iha Institutu Formasaun Profesores Katolika (Marista), Institutu Superior Cristal (ISC) no Institute of Bussines (IoB).

Entretantu, nia haktuir, profesór/a sira ne’ebé mak hanorin estudante sira iha Munisípiu Baucau hamutuk ema na’in 1.759.

Jornalista: Felicidade Ximenes

Editór: Rafy Belo

HAKEREK NO HATÁN

Please enter your comment!
Please enter your name here