idózus ho invalidés sira simu subsidiu iha Banku Nasionál Komersiu Timor Leste (BNCTL-sigla portugés), Dili 16 Jullu 2019. Imajen/Antonio Goncalves

DILI, 23 setembru 2019 (TATOLI)-Númeru idózus ho invalidés aumenta husi tinan ida ba tinan seluk.  Tanba ne’e, Institutu Nasionál Seguransa Sosiál (INSS) husu tan osan adisionál millaun $2 ba Komisaun Revizaun Orsamentu Polítika (KROP) atu konsidera iha OJE  2020.

Presidente Institutu Nasionál Seguransa Sosiál (INSS), Longuinhos Armando, dehan, iha posibilidade númeru idózus no invalidéz  sei aumenta to’o 100.000 tanba daudaun ne’e iha ona 98.052.

“Ami foin lalais iha enkontru ho Komisaun Revizaun Orsamentu Polítika  husu tan proposta adisionál ne’e hodi selu idózus tanba tuir previzaun ami nian,” Longuinhos Armando hateten ba Ajénsia TATOLI, ohin, iha nia serbisu fatin, MSSI, Caicoli, Dili.

Daudaun   ne’e  total idózus  no invalidéz  iha pagamentu faze dahuluk 98.052 no balun komesa rejista foun, tanba ne’e, to’o tinan oin  bele aumenta to’o ema 100.000,’’  Longuinhos esplika.

INSS mós prevee atu halo  rekrutamentu ba  funsionáriu foun hamutuk 36 hodi destaka iha diresaun INSS nian ne’ebé sei mamuk tanba daudaun ne’e menus funsionáriu hodi difikulta servisu instituisaun.

INSS mós iha planu sei loke tan diresaun iha rejiaun haat  hodi koloka pontu fokál atu presta serbisu instituisaun ba povu.

Iha tetu fiscal 2020, Institutu Nasionál Seguransa Sosiál iha millaun $40-resin hodi ezekuta ba rejime Kontributivu, rejime la’ós Kontributivu, saláriu  vensimentu no bens serbisu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here